വൺവേ ടിക്കറ്റ്

20–ാം നൂറ്റാണ്ടിന്റെ ആദ്യദശകങ്ങളിൽതന്നെ മലയാളികൾ ജീവിതാവസരങ്ങൾ തേടി ഇന്ത്യയ്ക്കുള്ളിലും വിദേശത്തും യാത്രയാരംഭിച്ചിരുന്നു. ഏതാണ്ട് ഇക്കാലത്തുതന്നെയാണ് ദാരിദ്ര്യത്തിൽനിന്നു മോചനം തേടി തിരുവിതാംകൂർ കർഷകർ മലബാറിലേക്കും കിഴക്കൻ മലകളിലേക്കുമുള്ള ചരിത്രപ്രധാനമായ കുടിയേറ്റം നടത്തിയത്. അഭ്യസ്തവിദ്യരായ കുറച്ചാളുകൾക്കെങ്കിലും ഇതേകാലത്തുതന്നെ മധ്യപൂർവദേശത്തും ആഫ്രിക്കയിലും മലയ തുടങ്ങിയിടങ്ങളിലും ഉദ്യോഗം ലഭിച്ചു. ഉപരിപഠനത്തിനായും കുറച്ചുപേർ നാടുവിട്ടു.