നല്ല പെരുമാറ്റത്തിന് ഫോർമുലകൾ

നല്ല പെരുമാറ്റത്തിന് പകരം വയ്ക്കാൻ മറ്റൊന്നുമില്ല. വ്യക്തികളുടെ പെരുമാറ്റരീതികളുടെ ആകെത്തുകയാണ് സമൂഹത്തിലെ മര്യാദ. ഓരോ സംസ്കാരത്തിന്റെയും മുഖമുദ്ര. മുതിർന്നവരുടെ പെരുമാറ്റരീതികൾ കുട്ടികൾ അനുകരിക്കുമെന്നതിൽ വാസ്തവമുണ്ട്. പക്ഷേ കൗമാരത്തിലെത്തുന്നവർ മോശമായ മാതൃകകളിൽ ആകൃഷ്ടരായി സാമാന്യമര്യാദകൾ മറന്നു പെരുമാറുന്നത് സാധാരണമായിട്ടുണ്ട്. വിദ്യാലയങ്ങളിൽ പ്രധാനാധ്യാപകനെ കൂട്ടം ചേർന്നു വെല്ലുവിളിക്കുകയും ആക്ഷേപിക്കുകയും ചെയ്യുന്നതു പ്രോത്സാഹിപ്പിക്കുന്ന സ്വാർഥ തൽപരരായ രാഷ്ട്രീയനേതാക്കൾ വരുംതലമുറയോടു കാട്ടുന്ന അപരാധം ചെറുതല്ല.