സികെ പത്മനാഭൻ പറഞ്ഞ ‘ആയാറാം ഗയാറാം’: പത്മജ വന്നു, ബിജെപിയിൽ അടി പൊട്ടി...?

‘‘ചിലർക്ക് ചില കാര്യങ്ങൾ നേടിയെടുക്കാൻ അസാധ്യ കഴിവുണ്ട്. മറ്റു പാർട്ടികളിലിരുന്ന് എല്ലാ ആനുകൂല്യങ്ങളും സൗകര്യങ്ങളും നേടിയതിന് ശേഷം ഇനി ഒന്നും കിട്ടാനില്ല എന്ന് തിരിച്ചറിഞ്ഞ് വരുന്നവരാണവർ.’’ മുതിർന്ന ബിജെപി നേതാവ് സി.കെ.പദ്മനാഭൻ ബിജെപിയിലേക്ക് ചേക്കേറുന്നവരെ സംബന്ധിച്ച് പറഞ്ഞ വിമർശനമാണിത്. ആരുടേയും പേരെടുത്ത് പറഞ്ഞില്ലെങ്കിലും ഏറ്റവും ഒടുവിൽ ബിജെപിയിലേക്ക് കൂടു മാറിയ പത്മജ വേണുഗോപാലിന് നേരെയുള്ള അമ്പ് ആയിരുന്നു അതെന്ന് വ്യക്തം. ദേശീയ ജനാധിപത്യ സഖ്യത്തിന്റെ കാസർകോട് മണ്ഡലം തിരഞ്ഞെടുപ്പ് കൺവൻഷൻ സി.കെ.പദ്മനാഭനാണ് ഉദ്ഘാടനം ചെയ്യേണ്ടിയിരുന്നത്. അവസാന നിമിഷം പക്ഷേ, ഉദ്ഘാടക മാറി. ഇന്നലെ പാർട്ടിയിലേക്ക് എത്തിയ പദ്മജയെ ഉദ്ഘാടകയാക്കിയതിനു നേരെയുള്ള രോഷം പദ്മനാഭൻ പ്രകടിപ്പിക്കുകയും ചെയ്തു.