‘വിരമിച്ച’ ഗുണ്ടകളെ വീട്ടിലെത്തി കാണാൻ പൊലീസ്; കൊച്ചിയിൽ ഇനി ‘ജിയോ ടാഗ്; ഉന്നതർ ഊതിക്കെടുത്തിയ ‘ആഗും’

2022ൽ ഗുണ്ടാവിളയാട്ടം അതിരുകടന്നപ്പോൾ ‘കാവൽ’ എന്ന പേരിൽ ഗുണ്ടാവിരുദ്ധ പദ്ധതിയുമായി പൊലീസ് രംഗത്തുവന്നെങ്കിലും കാര്യമായി ഒന്നും നടന്നില്ല. എന്നാൽ, 2023 ഫെബ്രുവരി ഏഴിന് ‘ഓപ്പറേഷൻ ആഗ്’ എന്ന പേരിൽ പൊലീസ് പുതിയ ആയുധം പുറത്തെടുത്തു. ‘ആക്‌സിലറേറ്റഡ് ആക്​ഷൻ എഗെയ്ൻസ്റ്റ് ഗൂൺസ്’ എന്ന ആ പദ്ധതി സേനയിലെ സത്യസന്ധരായ ഉദ്യോഗസ്ഥർക്ക് ആവേശമായിരുന്നു. ഒറ്റദിവസംകൊണ്ടു നൂറുകണക്കിനു ഗുണ്ടകളെ പിടികൂടി. ഉന്നതങ്ങളിൽനിന്നുള്ള ഇടപെടൽ ഉണ്ടാകില്ലെന്ന് ഉറപ്പുണ്ടെങ്കിൽ, തങ്ങൾക്ക് എന്തൊക്കെ ചെയ്യാനാകുമെന്നു കേരള പൊലീസ് സർക്കാരിനെയും ജനങ്ങളെയും ബോധ്യപ്പെടുത്തിയ ദിവസം. അകത്തായത് 2507 ഗുണ്ടകൾ! ഏറ്റവുമധികം പേർ പിടിയിലായതു തിരുവനന്തപുരം ജില്ലയിലായിരുന്നു. സിറ്റിയിലും റൂറലിലുമായി 333 പേർ.