പ്രതിമാസം 65000 രൂപ വരുമാനം ലഭിക്കാൻ എവിടെ നിക്ഷേപിക്കണം?

ഞാൻ 46 വയസ്സുള്ള കുടുംബനാഥനാണ്. എന്റെ മാത്രം ഉടമസ്ഥതയിൽ ഉള്ള സ്ഥലം 65 ലക്ഷം രൂപയ്ക്ക് വിറ്റ്, ആ സമ്പാദ്യം ദീർഘകാലത്തേക്ക് നിക്ഷേപിച്ചു പലിശ വരുമാനം ഉപയോഗിച്ച് ശിഷ്ടകാലം കഴിയാൻ ആഗ്രഹിക്കുന്നു. ഒരു മാസം 60000 -65000 രൂപ എല്ലാവിധ നികുതികളും കഴിഞ്ഞു ലഭിക്കാൻ ഞാൻ ഏതു തരത്തിലുള്ള നിക്ഷേപമാണ് തിരഞ്ഞെടുക്കേണ്ടത്. നിലവിൽ 5 ലക്ഷം രൂപയുടെ ഓഹരികൾ കൈവശമുണ്ട്.

–എം.ജെ.ജോർജ്

പ്രതിമാസ വരുമാനം ലഭ്യമാക്കുന്ന പദ്ധതികളാണ് സ്ഥിരനിക്ഷേപം, പോസ്റ്റ് ഓഫിസ് നിക്ഷേപം, ഇൻഷുറൻസ് ആനുവിറ്റി സ്കീം, ഡിബഞ്ചറുകൾ, മ്യൂച്വൽ ഫണ്ടുകളിലെ ഡിവിഡന്റ് ഫണ്ടുകൾ (ഐഡിസിഡബ്ല്യു സ്കീമുകൾ), സിസ്റ്റമാറ്റിക് വിഡ്രോവൽ പ്ലാനുകൾ (എസ്ഡബ്ല്യുപി ) എന്നിവ. നിലവിലെ പലിശ നിരക്ക് അനുസരിച്ച് 60,000- 65,000 രൂപ പ്രതിമാസ വരുമാനം ഉറപ്പിക്കുന്നതിനുള്ള സാധ്യത വിരളമാണ്. മ്യൂച്വൽ ഫണ്ടുകളിലെ സിസ്റ്റമാറ്റിക് വിഡ്രോവൽ പ്ലാനിലൂടെ ഈ തരത്തിൽ പ്രതിമാസ വരുമാനം ഉറപ്പിക്കുന്നതിന് കഴിയും. എന്നാൽ നിക്ഷേപ തുക വിപണിയിലെ ലാഭനഷ്ടങ്ങൾക്ക് വിധേയം ആയിരിക്കും. മ്യൂച്വൽ ഫണ്ടിലെ മൾട്ടി അസറ്റ് ഫണ്ടുകളിൽ തുക നിക്ഷേപിച്ച് സിസ്റ്റമാറ്റിക് പ്ലാനിലൂടെ 8% നിരക്കിൽ പ്രതിമാസം 40000-45000 രൂപ ലഭ്യമാക്കുന്നത് അനുയോജ്യമായ രീതിയാണ്. തുടർന്നുള്ള വർഷങ്ങളിൽ പ്രതിമാസ പിൻവലിക്കൽ തുകയും നിക്ഷേപ തുകയും വർധിക്കുന്നതിന് ഈ നിക്ഷേപം അവസരം നൽകുന്നു.

വി.ആർ.ധന്യ, സർട്ടിഫൈഡ് ഫിനാൻഷ്യൽ പ്ലാനർ, തിരുവനന്തപുരം