വിലക്കയറ്റം 4 മാസത്തെ കുറഞ്ഞ നിരക്കിൽ

ന്യൂഡൽഹി∙ ജനുവരിയെ അപേക്ഷിച്ച് ഫെബ്രുവരിയിലെ വിലക്കയറ്റത്തോതിൽ കാര്യമായ മാറ്റമില്ല. ജനുവരിയിൽ 5.1 ശതമാനമായിരുന്നത് ഫെബ്രുവരിയിൽ 5.09 ശതമാനമായി. രാജ്യമാകെയുള്ള 4 മാസത്തെ കുറഞ്ഞ നിരക്കാണിത്. ഡിസംബറിൽ 4 മാസത്തെ ഉയർന്ന നിരക്കായ 5.69 ശതമാനമായിരുന്നു. 

കഴിഞ്ഞ 6 മാസമായി റിസർവ് ബാങ്കിന്റെ സഹനപരിധിയായ 6 ശതമാനത്തിനുള്ളിലാണ് നിരക്ക്. വിലക്കയറ്റത്തോത് 4 ശതമാനത്തിലെത്തിക്കുകയാണ് ആർബിഐയുടെ ലക്ഷ്യം. ഭക്ഷ്യവസ്തുക്കളുമായി ബന്ധപ്പെട്ട വിലക്കയറ്റത്തോത് ജനുവരിയിൽ 8.3 ശതമാനമായിരുന്നത് 8.66 ശതമാനമായി കൂടി.

കേരളത്തിലെ വിലക്കയറ്റത്തോത് ജനുവരിയിൽ‌ 4.04% ആയിരുന്നത് ഫെബ്രുവരിയിൽ 4.64% ആയി ഉയർന്നു. നഗരമേഖലകളിലെ വിലക്കയറ്റം 4.79%, ഗ്രാമങ്ങളിലേത് 4.57%.

ഫെബ്രുവരിയിൽ വില കൂടിയതും കുറഞ്ഞതും

(ജനുവരിയെ അപേക്ഷിച്ചുള്ള വ്യത്യാസം)

∙ കുറഞ്ഞത്: ധാന്യങ്ങൾ, പാലും പാലുൽപന്നങ്ങളും, പഴങ്ങൾ, പയറുവർഗങ്ങൾ, പഞ്ചസാരയും പലഹാരങ്ങളും, സുഗന്ധവ്യഞ്ജനങ്ങൾ, ലഹരിയില്ലാത്ത പാനീയങ്ങൾ, പുകയിലയും പാൻ ഉൽപന്നങ്ങളും, തുണിത്തരങ്ങൾ, ചെരിപ്പ്

∙ കൂടിയത്: മത്സ്യവും മാംസവും, മുട്ട, പച്ചക്കറി