സൈബർ തട്ടിപ്പ് അക്കൗണ്ടുകൾ മരവിപ്പിക്കാൻ ബാങ്കുകൾക്ക് അനുമതി കിട്ടും

ന്യൂഡൽഹി∙ സൈബർ തട്ടിപ്പുകൾക്ക് ഉപയോഗിച്ചതായി സംശയിക്കപ്പെടുന്ന അക്കൗണ്ടുകൾ താൽക്കാലികമായി മരവിപ്പിക്കാൻ ബാങ്കുകൾക്ക് വൈകാതെ അനുമതി ലഭിച്ചേക്കും. ഇതുസംബന്ധിച്ച മാർഗരേഖയിൽ റിസർവ് ബാങ്ക് ഭേദഗതി വരുത്തുമെന്നാണ് സൂചന. 

നിലവിൽ അന്വേഷണ ഏജൻസികൾ കേസ് റജിസ്റ്റർ ചെയ്ത ശേഷം മാത്രമേ അക്കൗണ്ടുകൾ മരവിപ്പിക്കാൻ കഴിയൂ. പണം ഞൊടിയിടയിൽ പല അക്കൗണ്ടുകളിലൂടെ കടന്നുപോകുമെന്നതിനാൽ ഇത്തരം അക്കൗണ്ട് ഫ്രീസിങ് നടപടികൾ പലപ്പോഴും ഫലപ്രദമല്ല.

തുടർച്ചയായി സൈബർ തട്ടിപ്പുകളിൽ ഏർപ്പെടുന്ന അക്കൗണ്ടുകൾ താൽക്കാലികമായി വിലക്കാൻ ബാങ്കുകൾക്ക് അധികാരം നൽകുന്ന തരത്തിലായിരിക്കും ഭേദഗതി.