സ്വർണം കൈവശമുണ്ടോ? ഇക്കാര്യങ്ങൾ ശ്രദ്ധിച്ചില്ലെങ്കിൽ പിടിവീണേക്കാം

നിക്ഷേപത്തിനോ അലങ്കാരത്തിനോ ഏതുമാകട്ടെ , ആദായ നികുതി നിയമപ്രകാരം  സ്വർണവും വരുമാനമായി കണക്കാക്കുന്നു. അതാതു വർഷത്തെ നികുതി റിട്ടേൺ ഫയൽ ചെയ്യുമ്പോൾ കൈവശമോ ലോക്കറിലോ സൂക്ഷിച്ചു വച്ചിട്ടുള്ള സ്വർണത്തിന്റെ കണക്കു കൂടി നൽകേണ്ടതുണ്ട്. അതു കൊണ്ട് സ്വർണം വാങ്ങുന്നവർ നിർബന്ധമായും ഇക്കാര്യങ്ങൾ ശ്രദ്ധിക്കുക.

∙സ്വർണം വാങ്ങുമ്പോൾ ബില്ല് കൂടി ചോദിച്ചു വാങ്ങുക. ബില്ലില്ലാതെ സ്വർണം വാങ്ങരുത്. ബില്ല് സൂക്ഷിച്ചു വയ്ക്കണം. റിട്ടേൺ ഫയൽ ചെയ്യുമ്പോൾ ആവശ്യം വരും.

∙സ്വർണം എത്ര വേണമെങ്കിലും വാങ്ങാം. സൂക്ഷിക്കാം. പക്ഷേ കൃത്യമായ ഉറവിടം വെളിപ്പെടുത്തണം. പാരമ്പര്യമായി കൈമാറി കിട്ടിയതോ സമ്മാനമായി കിട്ടിയതോ ആണെങ്കിൽ അതിന്റെ രസീതോ ബന്ധപ്പെട്ട രേഖകളോ കൂടി ദാതാക്കളിൽ നിന്ന് വാങ്ങി സൂക്ഷിക്കാൻ മറക്കരുത്.

∙കണക്കിൽ പെടാത്ത സ്വർണം പിടിച്ചെടുക്കാൻ ആദായ നികുതി വകുപ്പ് ഉദ്യോഗസ്ഥർക്ക് അധികാരമുണ്ട്. തിരിച്ചുകിട്ടണമെങ്കിൽ ഉറവിടം വെളിപ്പെടുത്തേണ്ടതുണ്ട്.

∙ബില്ലോ രേഖകളോ ഇല്ലാതെ ഒരാൾക്ക് എത്ര സ്വർണം സൂക്ഷിക്കാം?

   വിവാഹിതയായ സ്ത്രീക്ക് 500 ഗ്രാം

   അവിവാഹിതക്ക് 250 ഗ്രാം

    പുരുഷന് 100 ഗ്രാം

∙ആചാരങ്ങളുടേയും പാരമ്പര്യങ്ങളുടേയും ഭാഗമായി സ്വർണം സൂക്ഷിച്ചു വയ്ക്കുന്നവരുണ്ട്. പക്ഷേ അത് അങ്ങനെയാണെന്ന് തെളിയിക്കാൻ ഉടമയ്ക്ക് കഴിയണം. 

∙ഒരാളുടെ പേരിലുള്ള ലോക്കറിൽ ഒന്നിലേറെ പേരുടെ സ്വർണം സൂക്ഷിച്ചിട്ടുണ്ടായിരിക്കും. എല്ലാവരുടെ പേരും ചേർത്ത് ജോയിന്റ് ലോക്കർ അക്കൗണ്ട് തുടങ്ങുന്നതാണ് നല്ലത്.

English summary : Gold and Income tax Rules