പുതിയ ഐടി പോർട്ടൽ വന്നു, ഇനി റിട്ടേൺ തയാറാക്കൽ എളുപ്പമാകും

ആദായനികുതി അടയ്ക്കാനുള്ള പുതിയ പോർട്ടൽ ഇന്നലെ മുതൽ സജീവമായി. www.incometax.gov.in എന്നതാണ് പുതിയ പോർട്ടൽ. പൂർണമായി പ്രവർത്തനസജ്ജമാകാൻ ഏതാനും ദിവസമെടുക്കും. നികുതി അടയ്ക്കാനുള്ള സംവിധാനം ഈ മാസം 18 മുതലാണ് ഏർപ്പെടുത്തുക.

പുതിയ പോർട്ടലിലെ സംവിധാനങ്ങൾ

∙സ്വതന്ത്ര റിട്ടേൺ തയാറാക്കൽ സോഫ്റ്റ്‌വെയറും ഐടിആർ 1, 4 (ഓൺലൈൻ, ഓഫ്‌ലൈൻ), ഐടിആർ 2 (ഓഫ് ലൈൻ) ഫോമുകൾ പൂരിപ്പിക്കാനുള്ള സഹായ ചോദ്യങ്ങളുമുണ്ടാകും.

∙ഐടിആർ 3 മുതൽ 7 വരെയുള്ളവയ്ക്കു സംവിധാനങ്ങൾ പിന്നീട്.  

∙നെറ്റ് ബാങ്കിങ്, യുപിഐ, ക്രെഡിറ്റ് കാർഡ്, ആർടിജിഎസ്, എൻഇഎഫ്ടി വഴി നികുതി അടയ്ക്കാം.

∙നികുതിദായകന്റെ വ്യക്തിഗത വിവരങ്ങൾ നോക്കാതെ റിട്ടേണുകൾ വിലയിരുത്തി ഉടൻ റീഫണ്ട് ലഭ്യമാകുന്ന രീതിയിലാകും പ്രവർത്തനം.

∙നികുതിദായകനു ശമ്പളം സംബന്ധിച്ച വിവരങ്ങൾ, വരുമാന മാർഗങ്ങൾ എന്നിവ ഉൾപ്പെടുത്തി പ്രൊഫൈൽ തയാറാക്കാം. റിട്ടേൺ നൽകുന്ന സമയത്ത് ഈ വിവരങ്ങൾ പ്രീഫില്ലിങ് ആയി ഫോമിൽ ഉൾപ്പെടുത്താം.

∙ഫോം പൂരിപ്പിക്കേണ്ട മാർഗങ്ങൾ, സംശയ നിവാരണം എന്നിവ മുഖപേജിൽത്തന്നെ ലഭ്യമാക്കും.

∙പാൻ–ആധാർ ബന്ധിപ്പിക്കാനുള്ള പേജിലേക്കുള്ള ലിങ്ക് ലഭ്യമാണ്.

∙നികുതി സംബന്ധമായ ഓർമപ്പെടുത്തലുകൾ പോർട്ടലിലുണ്ടാകും. റിട്ടേൺ നൽകിക്കഴിഞ്ഞാൽ അവശേഷിക്കുന്ന നടപടി ക്രമങ്ങൾ സന്ദേശങ്ങളായി ലഭിക്കും.

∙ മൊബൈൽ ആപ്പും 24 മണിക്കൂർ കോൾ സെന്ററും വൈകാതെ ആരംഭിക്കും.

∙റിട്ടേൺ വിവരങ്ങളും പുരോഗതിയും ഡാഷ്ബോർഡിൽ ലഭ്യമാകും.

∙ചാറ്റ് ബോട്ട്, എഫ്എക്യു, യൂസർ മാന്വലുകൾ, ഡെമോ വിഡിയോ എന്നിവയുമുണ്ടാകും.

English Summary : New Income Tax Portal Launched