പ്രഥമ ഓഹരി വില്‍പ്പനയ്ക് ഒരുങ്ങി യുടിഐ എഎംസി

യുടിഐ അസറ്റ് മാനേജ്‌മെന്റ് കമ്പനി പ്രഥമ ഓഹരി വില്‍പനയ്ക്ക് (ഐപിഒ) തയ്യാറെടുക്കുന്നു. ഐപിഒ തുടങ്ങുന്നതിന്  വേണ്ടിയുള്ള രേഖകള്‍ കമ്പനി ഈ ആഴ്ച തന്നെ വിപണി നിയന്ത്രകരായ സെബിക്ക് മുമ്പാകെ സമര്‍പ്പിച്ചേക്കും. ഐപിഒ വഴി 3,800-4,800 കോടി രൂപ സമാഹരിക്കാനാണ് കമ്പനി ലക്ഷ്യമിടുന്നത്.
എസ്ബിഐ, ബാങ്ക് ഓഫ് ബറോഡ, എല്‍ഐസി എന്നിവര്‍ ഉള്‍പ്പെടുന്ന ഓഹരി ഉടമകളുടെ കൈവശമുള്ള ഓഹരികളായിരിക്കും ഐപിഒ വഴി വിറ്റഴിക്കുക. യുടിഐ എഎംസിയിലെ  8.25 ശതമാനം ഓഹരികള്‍  ഐപിഒ വഴി വിറ്റഴിക്കുമെന്ന് അടുത്തിടെ എസ്ബിഐ പറഞ്ഞിരുന്നു. എസ്ബിഐ, എല്‍ഐസി, പഞ്ചാബ് നാഷണല്‍ ബാങ്ക്, ബാങ്ക് ഓഫ് ബറോഡ എന്നിവയ്ക്ക് 18.5 ശതമാനം വീതം ഓഹരി വിഹിതമാണ് യുടിഐ എഎംസിയില്‍ ഉള്ളത്. ശേഷിക്കുന്ന ഓഹരികള്‍ യുഎസ് കമ്പനിയായ ടി റോവ് പ്രൈസിന്റെ കൈവശമാണ്.
കൊട്ടക്, ഐസിഐസിഐ സെക്യൂരിറ്റീസ്, ജെഎം ഫിനാന്‍ഷ്യല്‍, ആക്‌സിസ് ക്യാപിറ്റല്‍,എസ്ബിഐ ക്യാപ് തുടങ്ങിയവരാണ് ഇഷ്യുവിന്റെ ബാങ്കര്‍മാര്‍.