എൽ ഐ സി 10 ലക്ഷത്തോളം ഐ പി ഒ അപേക്ഷകൾ നിരസിച്ചേക്കും

സാങ്കേതിക കാരണങ്ങളാൽ എൽ ഐ സിയുടെ ഐ പി ഒ അപേക്ഷകളിൽ 10 ലക്ഷം എങ്കിലും നിരസിക്കപ്പെടാൻ സാധ്യത. ചെറുകിട നിക്ഷേപകരിൽ നിന്നും ലഭിച്ച 73 ലക്ഷത്തോളം അപേക്ഷകളിൽ 65 ലക്ഷത്തോളം അപേക്ഷകളെ പരിഗണിക്കാനാകൂ എന്ന്  അതുമായി ബന്ധപ്പെട്ട  വൃത്തങ്ങൾ വ്യക്തമാക്കിയതായി ദേശീയ മാധ്യമം റിപ്പോർട്ട് ചെയ്തു. എൽ ഐ സി യുടെ ലിസ്റ്റിങിന് മുൻപായി എത്ര അപേക്ഷകൾ മൊത്തം ലഭിച്ചുവെന്നും എത്രയെണ്ണം നിരസിച്ചുവെന്നുമുള്ള കണക്കുകൾ പുറത്തുവിടും. നിരസിച്ച അപേക്ഷകളുടെ പണം  നാളെ തിരിക  ലഭിക്കും.

ലിസ്റ്റിങ് എങ്ങനെയാകുമെന്ന ആശങ്ക

പോളിസി ഉടമകളും ചെറുകിട നിക്ഷേപകരുമാണ് എൽ ഐ സിയുടെ ഐ പി ഒ വിജയത്തിന് കാരണം. വൻകിട നിക്ഷേപകരിൽ നിന്നുള്ള തണുത്ത പ്രതികരണം എൽ ഐ സി യുടെ ലിസ്റ്റിങിനെ ബാധിക്കാൻ സാധ്യതയുണ്ടെന്ന് റിപ്പോർട്ടുകളുണ്ട്. വിദേശ നിക്ഷേപകരും എൽ ഐ സിയുടെ ഐ പി ഒക്കെതിരെ മുഖം തിരിച്ചുവെന്നു കണക്കുകൾ സൂചിപ്പിക്കുന്നു. ഓഹരി വിപണി ഉഷാറല്ലാത്തതിനാൽ  എക്സ്ചേഞ്ചുകളിൽ എൽഐസിയുടെ  ലിസ്റ്റിങ് എങ്ങനെയാകുമെന്ന ആശങ്കകളുണ്ട്. എൽ ഐ സി യുടെ ഗ്രേ മാർക്കറ്റ് പ്രീമിയത്തിൽ ഇപ്പോൾ തന്നെ ഇടിവും രേഖപ്പെടുത്തുന്നു. ലിസ്റ്റ് ചെയ്യുന്നതിന് മുൻപായി ഐ പി ഒയുടെ വിപണിയിലുണ്ടാകുന്ന ഡിമാൻഡിനെയാണ് ഗ്രേ മാർക്കറ്റ് പ്രീമിയം എന്നതുകൊണ്ട് ഉദ്ദേശിക്കുന്നത്. ഗ്രേ മാർക്കറ്റ് പ്രീമിയം ഇനിയും ഇടിയുകയാണെങ്കിൽ ഐ പി ഓ വിലയേക്കാൾ കുറഞ്ഞ വിലക്കായിരിക്കും ഓഹരി വിപണിയിൽ ലിസ്റ്റ് ചെയ്യപ്പെടുക. 

എൽ ഐ സി യുടെ ഓഹരി അലോട്ട്മെന്റ് മെയ് 12നും സ്റ്റോക്ക് എക്സ്ചഞ്ചുകളിലെ ലിസ്റ്റിങ് മെയ് 17 നും ആയിരിക്കും. ഡീമാറ്റ് അക്കൗണ്ടുകളിലേക്ക് ഓഹരികൾ മെയ് 16ന്  എത്തും. 

സർക്കാർ 3.5 ശതമാനം ഓഹരികളാണ് ഐ പി ഓയിലൂടെ  വിൽക്കുന്നത്.ഓഹരി വിപണിയുടെ ചരിത്രത്തിലെ എക്കാലത്തെയും വലിയ ഐ പി ഒ ആയ എൽ ഐ സി യുടെ ഐ പി ഒയിൽ  പങ്കെടുക്കാൻ ബ്രോക്കറേജ് സ്ഥാപനങ്ങൾ എല്ലാം തന്നെ പല സൗകര്യങ്ങളും പുതിയതായി ഒരുക്കിയിരുന്നു. വളരെ നല്ല പ്രതികരണമായിരുന്നു നിക്ഷേപകരിൽനിന്നു എൽ ഐ സി യുടെ ഐ പി ഓയ്ക്ക് ലഭിച്ചത്. ഓഫർ 3 മടങ്ങോളം അധികം സബ്സ്ക്രൈബ് ചെയ്തു. ഐ പി ഒ യിൽ ഒരു ഓഹരിക്ക് 902-949 രൂപയാണ് പ്രൈസ് ബാൻഡ്. എൽ ഐ സിയുടെ പോളിസി ഉടമകൾക്കായി 10 ശതമാനം സംവരണവും ഏർപ്പെടുത്തിയിരുന്നു. നിങ്ങൾക്ക്  ഐ പി ഒ  അലോട്ട് ചെയ്തിട്ടുണ്ടോയെന്ന്  ബിഎസ്ഇ, എൻഎസ് ഇ വെബ്സൈറ്റുകളിൽ  നിന്ന്  അറിയാം.

∙www.bseindia.com സെറ്റിൽ പോയി എൽ ഐ സി ഐ പി ഒ എന്നത് എടുത്ത്  അപ്ലിക്കേഷൻ നമ്പർ അടിച്ചുകൊടുക്കുക 

∙പാൻ നമ്പർ കൊടുത്ത് ക്യാപ്ച്ച പൂരിപ്പിച്ച് സബ്മിറ്റ് ബട്ടൺ അമർത്തുക 

∙അലോട്ട് ചെയ്തിട്ടുണ്ടെങ്കിൽ വിവരം ലഭിക്കും.  

∙www.nseindia.com എന്ന സെറ്റിൽ  'ഇക്വിറ്റി' എന്നതിൽ പോയി എൽ ഐ സി ഐ പി ഒ   തിരഞ്ഞെടുത്ത്  

 അപ്ലിക്കേഷൻ നമ്പറും പാനും   കൊടുത്തും അലോട്ട്മെന്റ് ഉണ്ടോ എന്നറിയാം. 

English Summary : 10 Lakh LIC IPOs may be rejected