എൻടിപിസി ഗ്രീനിന്റെ ഐപിഒയ്ക്കായി ബാങ്കുകളുടെ മൽസരം
![ipo3 ipo3](https://img-mm.manoramaonline.com/content/dam/mm/mo/sampadyam/investment/images/2024/2/28/ipo3.jpg?w=1120&h=583)
Mail This Article
സർക്കാർ ഉടമസ്ഥതയിലുള്ള പവർ കമ്പനിയായ എൻടിപിസി ലിമിറ്റഡിന്റെ റിന്യൂവബിൾസ് സബ്സിഡിയറിയായ എൻടിപിസി ഗ്രീൻ എനർജി ലിമിറ്റഡിൻ്റെ 10,000 കോടി രൂപയുടെ ഐപിഒ ലഭിക്കാൻ പന്ത്രണ്ടിലധികം ബാങ്കുകൾ മത്സരിക്കുന്നു. നിർദ്ദിഷ്ട ഐപിഒയ്ക്കായി മർച്ചന്റ് ബാങ്കർമാരെ നിയമിക്കുന്നതിന് കമ്പനി ഈ മാസം ആദ്യം അപേക്ഷ നൽകിയിരുന്നു.
എസ്ബിഐ ക്യാപിറ്റൽ, ഐസിഐസിഐ സെക്യൂരിറ്റീസ്, ആക്സിസ് ക്യാപിറ്റൽ, ഡിഎഎം ക്യാപിറ്റൽ, നുവാമ തുടങ്ങിയ ആഭ്യന്തര നിക്ഷേപ ബാങ്കുകളും ലേലം വിളിച്ചവരിൽ ഉൾപ്പെടുന്നുവെന്ന് വൃത്തങ്ങൾ അറിയിച്ചു. രണ്ട് വിദേശ നിക്ഷേപ ബാങ്കുകളും മത്സരത്തിൽ ഉണ്ട്.
സോളാർ എനർജി, ഗ്രീൻ ഹൈഡ്രജൻ, ഗ്രീൻ അമോണിയ എന്നിവയില് കമ്പനിയുടെ കാപെക്സ് പ്ലാനുകൾക്കായി ഐപിഒ വരുമാനം ഉപയോഗിക്കുവാനാണ് ഉദ്ദേശിക്കുന്നത്.
2022 മെയ് മാസത്തിൽ ലൈഫ് ഇൻഷുറൻസ് കോർപ്പറേഷൻ ഓഫ് ഇന്ത്യയുടെ 21,000 കോടി രൂപയുടെ ഐപിഒയ്ക്ക് ശേഷമുള്ള ഏറ്റവും വലിയ പൊതുമേഖലാ സ്ഥാപനമായ പ്രാരംഭ ഓഹരി വിൽപ്പനയാണ് എൻടിപിസി ഗ്രീനിൻ്റെ ഐപിഒ.
പുനരുപയോഗ ഊർജ മേഖലയിൽ പൊതുമേഖലാ കമ്പനികൾ വലിയ രീതിയിൽ ഇപ്പോൾ പണം നിക്ഷേപിക്കുന്നുണ്ട്. 2023 നവംബറിൽ പുനരുപയോഗ ഊർജ പദ്ധതികളുടെ വികസനത്തിന് ധനസഹായം നൽകുന്ന സർക്കാർ ഉടമസ്ഥതയിലുള്ള സ്ഥാപനമായ ഇന്ത്യൻ റിന്യൂവബിൾ എനർജി ഡെവലപ്മെൻ്റ് ഏജൻസിയുടെ (ഐആർഇഡിഎ) 2,150 കോടി രൂപയുടെ ഓഹരി വിൽപ്പനയെ തുടർന്നാണ് നിർദ്ദിഷ്ട എൻടിപിസി ഗ്രീൻ ഐപിഒ വരുന്നത്.