ഈ ഓഹരികളിലെ ഇടപാട് ഇനി അന്നന്ന് പൂർത്തിയാകും,T +0 സെറ്റില്‍മെന്റിലൂടെ

ഇനി തിര‍ഞ്ഞെടുത്ത ഓഹരികളിൽ അന്നന്ന് ഇടപാട് പൂർത്തിയാക്കാനവസരം.  T+0, അല്ലെങ്കിൽ ട്രേഡ് + 0 സെറ്റിൽമെന്റ് ആണ് സെക്യൂരിറ്റികളുടെയും ഫണ്ടുകളുടെയും കൈമാറ്റം (ഓഹരി വ്യാപാരം) ഒരേ ദിവസം തന്നെ നടപ്പാക്കുന്നത്. ഇക്വിറ്റി ക്യാഷ് മാർക്കറ്റിൽ നിലവിലുള്ള T+1 സെറ്റിൽമെൻ്റ് സൈക്കിളിന് സമാന്തരമായി ഇത് പ്രവർത്തിക്കും. ഹ്രസ്വമായ സെറ്റിൽമെൻ്റ് സൈക്കിളുകൾ വിപണിയിലെ പണ ലഭ്യത  വർദ്ധിപ്പിക്കുന്നതിനും അപകടസാധ്യത കുറയ്ക്കുന്നതിനും സഹായിക്കുന്നു.

സെബിയുടെ മാർഗ്ഗനിർദ്ദേശങ്ങൾ പാലിച്ച് ഇന്ന് പ്രവർത്തനമാരംഭിച്ച ഈ ടി+0 സെറ്റിൽമെന്റിന്റെ ബീറ്റാ പതിപ്പ് ഓപ്ഷണൽ വിഭാഗത്തിൽ 63 അംഗങ്ങളുടെ പങ്കാളിത്തം ഉണ്ടായതായി ബിഎസ്ഇ അറിയിച്ചു. ആദ്യ ദിവസം 41 അംഗങ്ങൾ 10 ഓഹരികളിൽ വ്യാപാരം ചെയ്യുകയും മൊത്തം 329 ഓർഡറുകൾ നൽകുകയും ചെയ്തു. തുടക്കത്തിൽ ഈ ഓപ്ഷൻ പരിമിതമായ 25 ഓഹരികൾക്കും ചില  ബ്രോക്കർമാർക്കുമാണ് ലഭ്യമാകുക. 

അംബുജ സിമൻ്റ്‌സ്, അശോക് ലെയ്‌ലാൻഡ്, ബജാജ് ഓട്ടോ, ബാങ്ക് ഓഫ് ബറോഡ, ഭാരത് പെട്രോളിയം കോർപ്പറേഷൻ ലിമിറ്റഡ്, ബിർലാസോഫ്റ്റ്, സിപ്ല, കോഫോർജ്, ഡിവിസ് ലബോറട്ടറീസ്, ഹിൻഡാൽകോ ഇൻഡസ്ട്രീസ്, ഇന്ത്യൻ ഹോട്ടലുകൾ, ജെഎസ്ഡബ്ല്യു സ്റ്റീൽ, എൽഐസി ഹൗസിങ് ഫിനാൻസ്, എൽടിഐ മൈൻഡ്ട്രീ , എം ആർ എഫ്, നെസ്‌ലെ ഇന്ത്യ, എൻ എം ഡി സി, ഓയിൽ ആൻഡ്  നാച്ചുറൽ ഗ്യാസ് കോർപ്പറേഷൻ, പെട്രോനെറ്റ് എൽഎൻജി, സംവർദ്ധന മദർസൺ ഇൻ്റർനാഷണൽ, സ്റ്റേറ്റ് ബാങ്ക് ഓഫ് ഇന്ത്യ, ടാറ്റ കമ്മ്യൂണിക്കേഷൻസ്, ട്രെൻ്റ്,  യൂണിയൻ ബാങ്ക് ഓഫ് ഇന്ത്യ, വേദാന്ത എന്നിവയിലാണ് ഇത് നടപ്പിലായത്.