അസംഘടിത തൊഴിലാളികൾ ഇ- ശ്രം പോർട്ടലിൽ റജിസ്റ്റർ ചെയ്യൂ, ക്ഷേമപദ്ധതികളിൽ അംഗങ്ങളാകാം
Mail This Article
അസംഘടിത മേഖലയിലെ തൊഴിലാളിയാണോ നിങ്ങൾ ?എങ്കിൽ തീർച്ചയായും കേന്ദ്ര സർക്കാറിന്റെ ഇ- ശ്രം പോർട്ടലിൽ റജിസ്റ്റർ ചെയ്തിരിക്കണം. എങ്കിലേ കേന്ദ്ര സർക്കാർ നടപ്പിലാക്കുന്ന ക്ഷേമപദ്ധതികൾ നിങ്ങളെ തേടിയെത്തൂ. കോവിഡ് പോലുള്ള ദുരിതങ്ങൾ ഉണ്ടാകുമ്പോൾ സഹായം നൽകുന്നത് ഈ വിവരശേഖരം ഉപയോഗിച്ചായിരിക്കും. പേര് റജിസ്റ്റർ ചെയ്തു കഴിഞ്ഞാൽ പ്രധാനമന്ത്രി സുരക്ഷാ ഭീമായോജനയുടെ ഭാഗമാകും. അപകടം മൂലമുള്ള മരണത്തിനോ വൈകല്യത്തിനോ 2 ലക്ഷം രൂപയുടെ ഇൻഷൂറൻസ് പരിരക്ഷ ലഭിക്കും. ഇതിന്റെ ആദ്യ പ്രീമിയം സർക്കാർ അടയ്ക്കും. പദ്ധതിയിൽ അംഗമാകുന്നവർക്ക് ആധാറിനു സമാനമായ 12 അക്ക യൂണിവേഴ്സൽ അക്കൗണ്ട് നമ്പറും കാർഡും ലഭിക്കും .
∙ആർക്കെല്ലാം ചേരാം ?
അസംഘടിതമേഖലയിൽ ജോലി ചെയ്യുന്ന കർഷകർ, കർഷക തൊഴിലാളികൾ, വീട്ടുജോലിക്കാർ, ഓട്ടോ ഡ്രൈവർമാർ, പത്ര ഏജൻറുമാർ, വഴിയോര കച്ചവടക്കാർ, തൊഴിലുറപ്പു പദ്ധതിയിലെ അംഗങ്ങൾ, ആശാ വർക്കർമാർ, മത്സ്യതൊഴിലാളികൾ, നിർമാണ തൊഴിലാളികൾ, അതിഥി തൊഴിലാളികൾ എന്നിങ്ങനെ ആർക്കും അംഗമാകാം. ഇ പി എഫ്, ഇ എസ് ഐ പദ്ധതികളിൽ അംഗമായിരിക്കരുത്. ആദായ നികുതി നൽകുന്നവരാകരുത്. പ്രായപരിധി: 16-5.
∙എങ്ങനെ ചേരാം ?
ഇ- ശ്രം പോർട്ടൽ വഴി സ്വന്തമായോ സർക്കാർ സേവനങ്ങൾ ലഭ്യമാക്കുന്ന കോമൺ സർവീസ് സെന്ററുകൾ വഴിയോ അപേക്ഷിക്കാം. ആധാർ, ബാങ്ക് അക്കൗണ്ട് നമ്പർ, ആധാറുമായി ബന്ധിപ്പിച്ച മൊബൈൽ നമ്പർ തുടങ്ങിയ രേഖകൾ കരുതണം.
English Summary > Unorganized Sector Employees should Join in E Sharm Portal for Geting Government Benefits