വനിതാ ക്രിക്കറ്റിലെ ആദ്യ സ്വവർഗ ദമ്പതികളുടെ കുഞ്ഞ്, ഗ്രേസ് മേരി – ചിത്രങ്ങൾ

ക്രൈസ്റ്റ്ചർച്ച്∙ സ്വവർഗ വിവാഹത്തിലൂടെ രാജ്യാന്തര ക്രിക്കറ്റിൽ പുതുചരിത്രമെഴുതിയ ദമ്പതികളാണ് ന്യൂസീലൻഡ് വനിതാ ക്രിക്കറ്റ് ടീം താരങ്ങളായ ആമി സാറ്റർത്‌വൈറ്റും ലീ തഹൂഹുവും. ഇരുവർക്കും ഈ വർഷം ആദ്യം കുഞ്ഞു ജനിച്ചതും വിവിധ മാധ്യമങ്ങളിൽ വലിയ വാർത്താപ്രാധാന്യം നേടിയിരുന്നു. 2020 ജനുവരി 13നാണ് ഇവർക്ക് പെൺകുഞ്ഞു പിറന്നത്. കുഞ്ഞിന്റെ ജനനം മുതൽ വളർച്ചയുടെ വിവിധ കാലങ്ങളിലെ ചിത്രങ്ങൾ താരങ്ങൾ സമൂഹമാധ്യമങ്ങളിലൂടെ പങ്കുവയ്ക്കാറുണ്ട്. കുഞ്ഞിന്റെ ചിത്രം ആരാധകർക്കായി പങ്കുവയ്ക്കുന്നതിൽ ലീ തഹൂഹുവാണ് മുന്നിൽ. ഇരുവരും സമൂഹമാധ്യമങ്ങളിൽ പങ്കുവച്ച ചില ചിത്രങ്ങൾ കാണാം.

നേരത്തെ, ദമ്പതികളിലെ ലീ തഹൂഹുവാണ് കുഞ്ഞു ജനിച്ച വിവരം ഇൻസ്റ്റഗ്രാമിലൂടെ പുറത്തുവിട്ടത്. കുഞ്ഞിന്റെ ജനനവുമായി ബന്ധപ്പെട്ട് ആമി സാറ്റർത്‌വൈറ്റ് ദേശീയ ടീമിൽനിന്ന് നീണ്ട ഇടവേളയെടുത്തിരുന്നു. ‘ജനുവരി 13ന് ഗ്രേസ് മേരി സാറ്റർത്‌വൈറ്റ് ഞങ്ങളുടെ ജീവിതത്തിലേക്ക് കടന്നുവന്ന വിവരം അറിയിക്കുന്നതിൽ എനിക്കും ആമിക്കും അതിയായ ആഹ്ലാദമുണ്ട്. എല്ലാവർക്കും ഞങ്ങളുടെ സന്തോഷവും കൃതജ്ഞതയും’ – കുഞ്ഞിന്റെ വിരലുകൾ ചേർത്തുപിടിക്കുന്ന ഇരുവരുടെയും കരങ്ങളുടെ ചിത്രം സഹിതം തഹൂഹു ഇൻസ്റ്റഗ്രാമിൽ കുറിച്ചു.

2017 മാർച്ചിലാണ് ന്യൂസീലൻഡ് ദേശീയ ടീമിൽ അംഗങ്ങളായിരിക്കെ ഇരുവരും വിവാഹിതരായത്. കുഞ്ഞു ജനിക്കാൻ പോകുന്ന വിവരം ഇക്കഴിഞ്ഞ ഓഗസ്റ്റിലാണ് ആമി സാറ്റർത്‌വൈറ്റ് പുറത്തുവിട്ടത്. ഇതിനുള്ള തയാറെടുപ്പിനായി സജീവ ക്രിക്കറ്റിൽനിന്ന് ഇടവേളയെടുക്കുകയാണെന്നും ആമി അറിയിച്ചിരുന്നു.

2013 ഓഗസ്റ്റ് മുതൽ ന്യൂസീലൻഡിൽ സ്വവർഗ വിവാഹം അനുവദനീയമാണ്. ഓസ്ട്രേലിയയിലും സ്വവർഗ വിവാഹത്തിന് നിയമസാധുതയുണ്ട്. രാജ്യാന്തര ക്രിക്കറ്റിൽ ഇവരുൾപ്പെടെ സ്വവർഗ വിവാഹിതരായ മൂന്ന് ദമ്പതികളുണ്ട്. ദക്ഷിണാഫ്രിക്കൻ വനിതാ ടീം നായിക ഡെയ്ൻ വാൻ നീകർക്കും സഹതാരം മാരിസാൻ കാപ്പുമാണ് ഇവർക്കു പിന്നാലെ ആദ്യം വിവാഹിതരായത്. അതിനുശേഷം ന്യൂസീലൻഡിന്റെ ഹീലി ജെൻസണും ഓസ്ട്രേലിയയുടെ നിക്കോളാ ഹാൻകോക്കും സ്വവർഗ വിവാഹത്തിലൂടെ ജീവിതത്തിൽ ഒന്നിച്ചു.

English Summary:Amy Satterthwaite and Lea Tahuhu with their child - Images