ഐപിഎല്ലിൽ ‘പൊട്ടിത്തെറിക്കാൻ’ പൊടിപ്പയ്യൻമാർ; കൂട്ടത്തിൽ ഒരു മലയാളിയും!

ഐപിഎൽ പൂരത്തിനു ശനിയാഴ്ച കൊടി ഉയരുമ്പോൾ ബാറ്റിങ്, ബോളിങ് വെടിക്കെട്ടിനു തിരികൊളുത്താൻ കെൽപ്പുള്ള യുവതാരങ്ങൾ ആരൊക്കെയാവും? ടീമുകൾ പ്രതീക്ഷയർപ്പിക്കുന്ന യുവതാരങ്ങളിൽ ചിലരിതാ...

∙ യശസ്സ് ഉയർത്താൻ

യശസ്വി ജയ്‌സ്വാൾ

പ്രായം: 18

ടീം: രാജസ്ഥാൻ റോയൽസ്

2.40 കോടി രൂപയ്ക്കു ടീമിലെത്തിച്ച ഈ ഇടംകൈ ബാറ്റ്സ്മാനി‍ൽനിന്നു രാജസ്ഥാൻ പ്രതീക്ഷിക്കുന്നതു ബാറ്റിങ് വെടിക്കെട്ടല്ലാതെ മറ്റൊന്നുമല്ല. കഴിഞ്ഞ അണ്ടർ 19 ലോകകപ്പിലെ ടോപ് സ്കോറർ. ലിസ്റ്റ് എ മത്സരങ്ങളിൽ ഇരട്ട സെഞ്ചുറി നേടുന്ന ഏറ്റവും പ്രായം കുറഞ്ഞ താരം. അന്നത്തെ ആ ഡബിൾ സെഞ്ചുറിയിൽ കണ്ട 17 ഫോറും 12 സിക്സറുകളുമടങ്ങിയ ആളിക്കത്തൽ ദുബായിൽ ഒരിക്കൽക്കൂടി പ്രതീക്ഷിക്കുകയാണു റോയൽസ്. പാർട്‌ടൈം സ്പിന്നറായും താരത്തെ പ്രയോജനപ്പെടുത്താം. ഇതുവരെ ഒരൊറ്റ ട്വന്റി20 മത്സരംപോലും താരം കളിച്ചിട്ടില്ല.

∙ കറക്കി വീഴ്ത്താൻ

രവി ബിഷ്ണോയി

പ്രായം: 20

ടീം: കിങ്സ് ഇലവൻ പഞ്ചാബ്

അണ്ടർ 19 ലോകകപ്പിൽ 6 മത്സരങ്ങളിലായി 17 പേരെ കറക്കി വീഴ്ത്തിയ ഈ കൈക്കുഴ സ്പിന്നർ യുഎഇയിലെ സ്പിൻ വിക്കറ്റുകളിൽ പഞ്ചാബിനു ഭാഗ്യമെത്തിക്കുമോ? അനിൽ കുംബ്ലൈ പരിശീലകനായി ഉള്ളതിനാൽ രവിക്കു പ്ലേയിങ് ഇലവനിൽ സാധ്യതയേറെയാണ്. രവിയുടെ ഗൂഗ്ലികൾക്കായി പഞ്ചാബ് ആരാധകർ കാത്തിരിക്കുന്നു. ഇതുവരെ 6 ട്വന്റികൾ കളിച്ചിട്ടുണ്ട്. 6 വിക്കറ്റും വീഴ്ത്തി. ശരാശരി: 23.

∙ കമോൺ ദേവു

ദേവ്ദത്ത് പടിക്കൽ

പ്രായം: 20

ടീം: റോയൽ ചാലഞ്ചേഴ്സ് ബാംഗ്ലൂർ

ബെംഗളൂരുവിൽ താമസിക്കുന്ന മലപ്പുറം സ്വദേശികളുടെ മകനായ ദേവ്‌ദത്തിന് ആഭ്യന്തര ക്രിക്കറ്റിലെ മികച്ച പ്രകടനമാണു കരുത്ത്. വിജയ് ഹസാരെയിലെയും മുഷ്താഖ് അലി ട്രോഫിയിലെയും ടോപ് സ്കോററായ ഈ ഇടംകൈ ബാറ്റ്സ്മാൻ ടീമിൽ ഇടംകിട്ടിയാൽ മിടുക്കു തെളിയിക്കാൻ കാത്തുനിൽന്നു. വീട്ടുകാരുടെ പ്രിയപ്പെട്ട ‘ദേവു’ ഇതുവരെ 12 ട്വന്റി20 മത്സരങ്ങൾ കളിച്ചു. 580 റൺസ്. സ്ട്രൈക് റേറ്റ്: 175.75!

∙ സൂപ്പർ സായ്

ആർ.സായ് കിഷോർ

പ്രായം: 23

ടീം: ചെന്നൈ സൂപ്പർ കിങ്സ്

ചെന്നൈ ടീം പട്ടികയെടുത്താൽ പലപ്പോഴും അവസാന സ്ഥാനത്തേ ഈ ഇടംകൈ സ്പിന്നറുടെ പേരു കാണൂ. കഴിഞ്ഞ മുഷ്താഖ് അലി ട്രോഫി ട്വന്റി20യിൽ തമിഴ്നാടിനായി 20 വിക്കറ്റുകൾ വീഴ്ത്തിയ കിഷോർ റൺസ് വിട്ടുകൊടുക്കുന്നതിൽ പക്ഷേ, പിശുക്കനായിരുന്നു. ഇക്കോണമി: 4.63. പ്രതിഭ തിരിച്ചറിയുന്നതിൽ മിടുക്കനായ എം.എസ്.ധോണി കിഷോറിന് അവസരം കൊടുക്കുമോ? ഇതുവരെ 22 ട്വന്റി20കളിൽനിന്നായി 25 വിക്കറ്റ്. ശരാശരി: 16.76.

∙ പേസ് കരുത്ത്

കമലേഷ് നാഗർകോട്ടി

പ്രായം: 20

ടീം: കൊൽക്കത്ത നൈറ്റ് റൈഡേഴ്സ്

2018ലെ അണ്ടർ 19 ലോകകപ്പിനുശേഷം താരപ്പകിട്ടിലായിരുന്നു കമലേഷ്. പക്ഷേ, പരുക്ക് വലച്ചു. താരം ഫിറ്റാണെന്നാണു കൊൽക്കത്ത ക്യാപ്റ്റൻ ദിനേശ് കാർത്തിക്കിന്റെ പ്രതികരണം. അവസരത്തിനായി കാത്തിരിക്കുകയാണു താരം; പൊട്ടിത്തെറിക്കാൻ. ഇതുവരെ ഒരൊറ്റ ട്വന്റി20യിൽപ്പോലും ബോ‍ൾ ചെയ്തിട്ടില്ല.

English Summary: Indian Youngsters To Star In IPL 2020 At UAE