6 കളികളിൽ 23 വിക്കറ്റ്, ഷമി തന്നെയാണ് ഹീറോ; മാറ്റിനിർത്തിയവരെ അമ്പരപ്പിച്ച ബ്രില്യൻസ്

മുംബൈ ∙ ഈ താരത്തെയാണല്ലോ ലോകകപ്പിലെ ആദ്യ 4 കളികളിൽ പുറത്തിരുത്തിയതെന്ന പശ്ചാത്താപം രോഹിത് ശർമയെയും ടീം മാനേജ്മെന്റിനെയും അലട്ടുന്നുണ്ടാകും. എഴുതിത്തള്ളിയവരെയും മാറ്റിനിർത്തിയവരെയുമെല്ലാം അമ്പരപ്പിച്ചാണ് ഈ ലോകകപ്പിൽ ഷമിയുടെ അത്ഭുത പ്രകടനം. 6 കളികളിൽ 23 വിക്കറ്റ്. അതിൽ 5 വിക്കറ്റ് നേട്ടം 3 തവണ. അതിൽ ഏറ്റവും മികച്ചത് ഇന്നലെ സെമിയിൽ കിവീസിനെ തകർത്ത 7 വിക്കറ്റും. കരിയറിലെ തന്നെ ഏറ്റവും മികച്ച പ്രകടനവുമായാണ് ഷമി തന്റെ 100–ാം ഏകദിന മത്സരം അവിസ്മരണീയമാക്കിയത്.

ഇന്നലെ സെമിയിൽ ബുമ്രയുടെ പന്തിൽ കിവീസ് ക്യാപ്റ്റൻ കെയ്ൻ വില്യംസൻ നൽകിയ അനായാസ ക്യാച്ച് ഷമി പാഴാക്കിയിരുന്നു. നിരാശാജനകമായ ആ നിമിഷത്തിന്റെ കൂടി പകരംവീട്ടലായിരുന്നു വില്യംസൻ അടക്കമുള്ളവരുടെ 7 വിക്കറ്റ്. പടക്കുതിരയെപ്പോലെ കുതിച്ചെത്തി സീം കൃത്യതയോടെ മാരകമായ പന്തുകൾ വർഷിക്കുന്ന ഷമി ലോകകപ്പിൽ ഇന്ത്യൻ ബോളിങ് നിരയുടെ കുന്തമുനയാണ്. 100 ഏകദിനങ്ങളിൽ നിന്ന് 194 വിക്കറ്റ് കൊയ്ത ഷമി 5 തവണയാണ് 5 വിക്കറ്റ് നേട്ടം സ്വന്തമാക്കിയിട്ടുള്ളത്. 64 ടെസ്റ്റിൽ നിന്നായി 229 വിക്കറ്റുമുണ്ട്.

ഈ ലോകകപ്പിൽ ഹാർദിക് പാണ്ഡ്യ പരുക്കേറ്റ് പുറത്തായ ഒഴിവിലാണ് പുറത്തിരുന്ന ഷമിയെ പ്ലേയിങ് ഇലവനിൽ ഉൾപ്പെടുത്തുന്നത്. പാണ്ഡ്യയ്ക്കു പരുക്കേറ്റില്ലായിരുന്നെങ്കിൽ ഷമിക്ക് അവസരം ലഭിക്കുമായിരുന്നോ എന്ന കൗതുകകരമായ ചോദ്യമുണ്ട്. ആദ്യ 4 കളികളിൽകൂടി ഉണ്ടായിരുന്നെങ്കിൽ ഷമിയുടെ വിക്കറ്റ് വേട്ട എവിടെയെത്തുമായിരുന്നു എന്നതും ചിന്തിക്കാനുള്ള കാര്യമാണ്!