ഷായ് ഹോപിന് സെഞ്ചറി, ഇംഗ്ലണ്ടിനെ വീഴ്ത്തി വെസ്റ്റിൻഡീസ് കുതിപ്പ്

നോർത്ത് സൗണ്ട് (ആന്റിഗ്വ) ∙ ഏകദിന ലോകകപ്പിലെ തകർച്ചയ്ക്കു പരിഹാരം കാണാമെന്ന പ്രതീക്ഷയോടെ വെസ്റ്റിൻഡീസിനെതിരായ ഏകദിന പരമ്പരയ്ക്കിറങ്ങിയ ഇംഗ്ലണ്ടിന് ആദ്യ മത്സരത്തിൽ തോൽവി. ഷായ് ഹോപിന്റെ സെഞ്ചറിയും (109*) റൊമാരിയോ ഷെപ്പേഡിന്റെ 48 റൺസ് പ്രകടനവുമാണ് വിൻഡീസിന് 4 വിക്കറ്റ് വിജയം സമ്മാനിച്ചത്.

സ്കോർ: ഇംഗ്ലണ്ട് – 50 ഓവറിൽ 325 ഓൾഔട്ട്; വെസ്റ്റിൻഡീസ് – 48.5 ഓവറിൽ 6ന് 326. ഇത്തവണ ഏകദിന ലോകകപ്പിന് യോഗ്യത നേടാനാവാതെ പോയ വിൻഡീസിന് വലിയ ആത്മവിശ്വാസമേകുന്നതായി ഈ വിജയം. 

39–ാം ഓവറിൽ 5ന് 213 എന്ന നിലയിൽ തകർന്ന വിൻഡീസിനെ ഷായ് ഹോപ് ആണ് രക്ഷിച്ചത്. 83 പന്തിൽ 109 റൺസുമായി പുറത്താകാതെനിന്ന ഹോപ്പിന് 28 പന്തിൽ 48 റൺസെടുത്ത റൊമാരിയോ ഷെപ്പേഡ് മികച്ച പിന്തുണ നൽകി. ഷായ് ഹോപ് സാം കറനെതിരെ 4 പന്തിനിടെ 3 സിക്സറുകൾ നേടിയതു നിർണായകമായി. കറൻ 98 റൺസാണ് വിട്ടുകൊടുത്തത്. ഇംഗ്ലിഷ് ബാറ്റർമാരിൽ ക്യാപ്റ്റൻ ജോസ് ബട്‌ലർ വീണ്ടും നിറംമങ്ങിയപ്പോൾ ഹാരി ബ്രൂക്ക് (71), ഫിൽ സോൾട്ട് ( 45) എന്നിവർ തിളങ്ങി.