ജസ്പ്രീത് ബുമ്രയുടെ ഭാര്യയ്ക്ക് തടി കൂടുതലെന്ന് കമന്റ്; രൂക്ഷവിമർശനവുമായി സഞ്ജന ഗണേശൻ
Mail This Article
മുംബൈ∙ ഇന്ത്യൻ ക്രിക്കറ്റ് താരം ജസ്പ്രീത് ബുമ്രയുടെ ഭാര്യ സഞ്ജന ഗണേശനെതിരെ സമൂഹമാധ്യമത്തിൽ ബോഡി ഷെയ്മിങ്. ഭാര്യയോടൊപ്പമുള്ള ചിത്രം ബുമ്ര ഇൻസ്റ്റഗ്രാമിൽ പങ്കുവച്ചതോടെയാണ് സഞ്ജനയ്ക്ക് തടി കൂടുതലാണെന്ന് ഒരാൾ കമന്റ് ഇട്ടത്. തൊട്ടുപിന്നാലെ ഇയാൾക്കു മറുപടിയുമായി സഞ്ജന തന്നെ രംഗത്തെത്തി. ‘‘നിങ്ങൾക്ക് സ്കൂളിലെ സയൻസ് പാഠപുസ്തകത്തിലെ കാര്യങ്ങൾ പോലും ഓർമയില്ല. സ്ത്രീ ശരീരത്തെക്കുറിച്ച് എന്തു ധൈര്യത്തിലാണു നിങ്ങൾ സംസാരിച്ചത്. മാറി പോകു’’– എന്നായിരുന്നു സഞ്ജനയുടെ പ്രതികരണം.
തൊട്ടുപിന്നാലെ സഞ്ജന ഗണേശനു പിന്തുണയായി നിരവധി ആരാധകരുമെത്തി. സഞ്ജനയുടെ പ്രതികരണം സമൂഹമാധ്യമത്തിൽ വൈറലാണ്. അടുത്തിടെയാണ് ബുമ്രയ്ക്കും സഞ്ജനയ്ക്കും ആദ്യത്തെ കുഞ്ഞ് പിറന്നത്. ഇംഗ്ലണ്ടിനെതിരായ ടെസ്റ്റ് പരമ്പരയ്ക്കിടെ ചെറിയ ഇടവേള ലഭിച്ച ബുമ്ര, വീണ്ടും ടീമിനൊപ്പം ചേർന്നു.
രാജ്കോട്ടിൽ വ്യാഴാഴ്ച തുടങ്ങുന്ന മൂന്നാം ടെസ്റ്റിൽ ബുമ്ര കളിക്കും. വിശാഖപട്ടണത്തു നടന്ന രണ്ടാം ടെസ്റ്റിൽ താരം ഒൻപതു വിക്കറ്റുകൾ വീഴ്ത്തിയിരുന്നു. രണ്ടാം മത്സരം ഇന്ത്യ വിജയിച്ചതോടെ പരമ്പര 1–1 എന്ന നിലയിലെത്തി. പരമ്പരയിൽ ആകെ അഞ്ച് മത്സരങ്ങളാണുള്ളത്.