എ പ്ലസ് കരാറിൽ നാലു പേർ; കളിക്കാതിരുന്നിട്ടും പന്ത് പട്ടികയിൽ, ഗില്ലിന് ‘പ്രൊമോഷൻ’

മുംബൈ ∙ ഇന്ത്യൻ ക്രിക്കറ്റ് ടീമിന്റെ വാർഷിക കരാറിൽനിന്ന് മധ്യനിര ബാറ്റർ ശ്രേയസ് അയ്യരും വിക്കറ്റ് കീപ്പർ ബാറ്റർ ഇഷൻ കിഷനും പുറത്ത്. ദേശീയ ടീമിൽ നിന്നു പുറത്താകുന്ന താരങ്ങൾ ആഭ്യന്തര ക്രിക്കറ്റ് മത്സരങ്ങൾ കളിക്കണമെന്ന ബിസിസിഐ നിർദേശം പാലിക്കാത്തതാണ് ഇരുവർക്കും തിരിച്ചടിയായത്. കഴിഞ്ഞ 3 മാസമായി ക്രിക്കറ്റിൽ നിന്നു വിട്ടുനിൽക്കുന്ന ഇഷൻ കിഷൻ കഴിഞ്ഞവർഷം സി ഗ്രേഡ് കരാറിലായിരുന്നു. ഇംഗ്ലണ്ടിനെതിരായ രണ്ടാം ടെസ്റ്റിനുശേഷം ദേശീയ ടീമിൽ നിന്നു പുറത്തായ‌ ശ്രേയസ് അയ്യർ, തുടർന്ന് രഞ്ജി ട്രോഫി ക്വാർട്ടർ ഫൈനലിൽ മുംബൈയ്ക്കായി കളിച്ചിരുന്നില്ല. ‌ 

∙ ബിസിസിഐയുടെ പുതുക്കിയ കരാറിൽ ഉൾപ്പെട്ടിരിക്കുന്നത് മലയാളി താരം സഞ്ജു സാംസൺ (ഗ്രേഡ് സി) അടക്കം 30 പേർ

∙ 7 കോടി രൂപ വാർഷിക പ്രതിഫലമുള്ള എ പ്ലസ് കരാറിൽ 4 പേർ മാത്രം; രോഹിത് ശർമ, വിരാട് കോലി, രവീന്ദ്ര ജഡേജ, ബുമ്ര

∙ 5 കോടി രൂപയുടെ എ ഗ്രേഡ് കരാറിലേക്ക് ശുഭ്മൻ ഗില്ലിനു സ്ഥാനക്കയറ്റം. ആർ.അശ്വിൻ, മുഹമ്മദ് ഷമി, കെ.എൽ.രാഹുൽ, ഹാർദിക് പാണ്ഡ്യ എന്നിവരും എ ഗ്രേഡിൽ

∙ ഒരു വർഷമായി മത്സരങ്ങളിൽ നിന്നു വിട്ടുനിൽക്കുന്ന ഋഷഭ് പന്തിനെയും കരാറിൽ ഉൾപ്പെടുത്തി; പന്ത് എ ഗ്രേഡിൽ നിന്ന് ബിയിലേക്കു താഴ്ന്നു

കരാറിൽ നിന്ന് പുറത്തായ പ്രമുഖ താരങ്ങൾ: 

ചേതേശ്വർ പൂജാര, ഉമേഷ് യാദവ്, ശിഖർ ധവാൻ, യുസ്‌വേന്ദ്ര ചെഹൽ, ദീപക് ഹൂഡ

കരാറിലെ പുതുമുഖങ്ങൾ: 

യശസ്വി ജയ്സ്വാൾ (ബി ഗ്രേ‍ഡ്, 3 കോടി), തിലക് വർമ, ഋതുരാജ് ഗെയ്ക്‌വാദ്, ജിതേഷ് ശർമ, മുകേഷ് കുമാർ, രജത് പാട്ടിദാർ (എല്ലാവരും സി ഗ്രേഡ്, ഒരു കോടി)

കരാർ നിബന്ധനകൾ

ഒരു വർഷത്തിനിടെ 3 ടെസ്റ്റ് മത്സരങ്ങൾ, 8 ഏകദിനം, 10 ട്വന്റി20 എന്നിവയിൽ ഏതെങ്കിലും പൂർത്തിയാക്കുന്ന താരങ്ങൾ നേരിട്ട് ബിസിസിഐ കരാറിന്റെ ഭാഗമാകും

ദേശീയ ടീമിൽ ഉൾപ്പെടാത്ത സന്ദർഭങ്ങളിൽ താരങ്ങൾ ആഭ്യന്തര മത്സരങ്ങളിൽ സജീവമാകണം.