മികച്ച താരങ്ങളെ ടീമിലെത്തിച്ചാൽ ഇന്ത്യ ട്വന്റി20 ലോകകപ്പ് ഫൈനൽ കളിക്കും: ഡേവിഡ് മലാൻ

ന്യൂഡൽഹി ∙ യുഎസിലും വെസ്റ്റിൻഡീസിലുമായി ഈ ജൂണിൽ നടക്കുന്ന ട്വന്റി20 ലോകകപ്പിൽ ഇന്ത്യ ഫൈനലിലെത്താൻ എല്ലാവിധ സാധ്യതകളുമുണ്ടെന്ന് ഇംഗ്ലണ്ട് ബാറ്റർ ഡേവിഡ് മലാൻ. ‘മികച്ച പ്രകടനം നടത്തുന്ന താരങ്ങളെ ടീമിലെത്തിക്കാൻ സിലക്ടർമാർ ശ്രമിച്ചാൽ ഇന്ത്യ ഫൈനൽ കളിക്കാൻ എല്ലാ സാധ്യതയും ഞാൻ കാണുന്നു. ഈ സീസൺ ഐപിഎലിൽ ഒരുപിടി മികച്ച ആഭ്യന്തര താരങ്ങളുടെ പ്രകടനം കാണുന്നുണ്ട്. സിലക്ടർമാർക്ക് അവരുടെ ജോലി എളുപ്പമാകില്ല. വിരാട് കോലിയെപ്പോലുള്ള പ്രതിഭകളും മികച്ച പ്രകടനം നടത്തുന്നത് സിലക്‌ഷനിൽ വെല്ലുവിളിയായേക്കും ’ – മലാൻ പറഞ്ഞു.

സ്പോർട്സ് ഗെയിമിങ് കമ്പനിയായ ലൈൻബാറ്റ് ന്യൂസിന്റെ ക്രിക്കറ്റ് അംബാസഡറായ ശേഷമുള്ള മാധ്യമസംവാദത്തിൽ പങ്കെടുക്കുകയായിരുന്നു മലാൻ. ജൂൺ 5ന് അയർലൻഡിനെതിരെയാണു ട്വന്റി20 ലോകകപ്പിൽ ഇന്ത്യയുടെ ആദ്യ മത്സരം.