മോശം കാലാവസ്ഥ: കൊൽക്കത്ത ടീം വാരാണസിയിൽ കുടുങ്ങി

ന്യൂഡൽഹി∙ മോശം കാലാവസ്ഥ മൂലം വിമാനം വഴിതിരിച്ചുവിട്ടതോടെ വാരാണസിയിൽ കുടുങ്ങി കൊൽക്കത്ത നൈറ്റ് റൈഡേഴ്സ് (കെകെആർ) താരങ്ങൾ. ലക്നൗ സൂപ്പർ ജയന്റ്സിനെതിരായ ഐപിഎൽ മത്സരശേഷം കൊൽക്കത്തയിലേക്ക് മടങ്ങാനാണ്  തീരുമാനിച്ചിരുന്നത്. 

തിങ്കളാഴ്ച വൈകിട്ട് 5.45നായിരുന്നു വിമാനം. എന്നാൽ കാലാവസ്ഥ മോശമായതോടെ വിമാനം ആദ്യം ഗുവാഹത്തിയിലേക്കും പിന്നീട് വാരാണസിയിലേക്കും വഴിതിരിച്ചുവിട്ടു. 

കാലാവസ്ഥ അനുകൂലമാകാതെ വന്നതോടെ വാരാണസിയിൽ തന്നെ തങ്ങാൻ ടീമിനോടു നിർദേശിക്കുകയായിരുന്നു. ഇന്നലെ ഉച്ചയോടെ ടീം വാരാണസിയിൽ നിന്ന് കൊൽക്കത്തയിലേക്കു മടങ്ങി. 11ന് മുംബൈയ്ക്കെതിരെയാണ് കൊൽക്കത്തയുടെ അടുത്ത മത്സരം.