ബാർസയ്ക്കായി 767 മത്സരങ്ങൾ: ചാവിയുടെ റെക്കോർഡിനൊപ്പം മെസ്സി

ബാർസിലോന ∙ ബാർസിലോനയ്ക്കായി ഏറ്റവുമധികം മത്സരങ്ങൾക്ക് (767) ഇറങ്ങിയ താരമെന്ന റെക്കോർഡിൽ ചാവി ഹെർണാണ്ടസിനൊപ്പം എത്തിയ കളിയിൽ ലയണൽ മെസ്സിക്കു ഡബിൾ.

സ്പാനിഷ് ലാ ലിഗ ഫുട്ബോളിൽ വെസ്കയ്ക്കെതിരെ ബാർസിലോന 4–1നു ജയിച്ച കളിയിലെ വിജയശിൽപി 2 ഗോളുകൾ നേടിയ മെസ്സിയാണ്. 13–ാം വയസ്സിൽ ബാർസിലോനയുടെ ലാ മാസിയ ഫുട്ബോൾ നഴ്സറിയിൽ ചേർന്ന മെസ്സി 2004ലാണു സീനിയർ ടീമിൽ അരങ്ങേറിയത്.

ജയത്തോടെ ബാർസ 27 കളിയിൽ 59 പോയിന്റുമായി 2–ാം സ്ഥാനമുറപ്പിച്ചു. ഒന്നാമതുള്ള അത്‌ലറ്റിക്കോ മഡ്രിഡിലേക്ക് (27 കളിയിൽ 63 പോയിന്റ്) 4 പോയിന്റ് അകലം മാത്രം.

English Summary: Messi makes record-equalling 767th appearance for the Catalans