മെസ്സിക്കു കോവിഡ്, ഐസലേഷനിൽ; പിഎസ്ജിയിലെ 3 സഹതാരങ്ങളും പോസിറ്റീവ്

പാരിസ്∙ ഫ്രഞ്ച് ഫുട്ബോൾ ക്ലബ് പാരിസ് സെയ്ന്റ് ജെർമെയ്ന്റെ അർജന്റീന മുന്നേറ്റ നിര താരം ലയണൽ മെസ്സി കോവിഡ് പോസിറ്റീവായതായി ക്ലബ് അധികൃതർ സ്ഥിരീകരിച്ചു.

മെസ്സിയെ കൂടാതെ മറ്റു 3 താരങ്ങൾക്കു കൂടി കോവിഡ് സ്ഥിരീകരിച്ചതായും 4 പേരെയും കോവിഡ് മാനദണ്ഡങ്ങൾ പ്രകാരം ഐസലേഷനിൽ‌ പ്രവേശിപ്പിച്ചതായും ക്ലബ് വാർത്താക്കുറിപ്പിറക്കി.

മെസ്സിയെക്കൂടാതെ പ്രതിരോധനിര താരം യുവാൻ ബെർനാട്ട്, റിസർവ് ഗോൾകീപ്പർ സെർജിയോ റിക്കോ, മധ്യനിരതാരം നാഥൻ മിറ്റുമസല എന്നിവരാണു പോസിറ്റീവായത്. 

പരുക്കിനെത്തുടർന്നു വിശ്രമത്തിലുള്ള ബ്രസീൽ സൂപ്പർ താരം നെയ്മാർ 3 ആഴ്ചകൾക്കു ശേഷം കളിക്കളത്തിലേക്കു മടങ്ങിയെത്തുമെന്നും അധികൃതർ അറിയിച്ചു.  തിങ്കളാഴ്ച വാനേസിനെതിരായാണ് പിഎസ്ജിയുടെ അടുത്ത മത്സരം.  

10 ദശലക്ഷത്തിൽ അധികം കോവിഡ് കേസുകളാണ് ഫ്രാൻസിൽ ഇതുവരെ റജിസ്റ്റർ ചെയ്തത്. 

English Summary: COVID: Lionel Messi, three other PSG players positive