കോട്ടയം ∙ കാത്തിരുന്നത് ഈ നിമിഷത്തിനു വേണ്ടിയാണ്. ഹൈദരാബാദ് എഫ്സി–കേരള ബ്ലാസ്റ്റേഴ്സ് മത്സരത്തിനു ശേഷം ഐഎസ്എൽ പോയിന്റ് ടേബിളിൽ ഒന്നാം സ്ഥാനത്ത് ഒരു പേര് തെളിഞ്ഞു– കേരള ബ്ലാസ്റ്റേഴ്സ്. ആർത്തു വിളിച്ചവർക്ക് ഒരു ദുഃഖം മാത്രം മത്സരം കൊച്ചിയിൽ അല്ലാതെ പോയി. സമീപനത്തിലും കളിയിലും ഐഎസ്എൽ ഇതുവരെ കാണാത്ത ഒരു കേരളത്തെയാണ് ഇൗ സീസണിൽ കാണാൻ സാധിച്ചത്.
പോയിന്റ് പട്ടികയിൽ ഒന്നാമത് എത്തി എന്നതു മാത്രമല്ല, കളിയിലും സമീപനത്തിലും കേരളം ആകെ മാറി. കേരളത്തിന്റെ മാറ്റത്തെക്കുറിച്ചു മുൻ ഇന്ത്യൻ ഫുട്ബോൾ താരം ജോ പോൾ അഞ്ചേരിയും കേരള ബ്ലാസ്റ്റേഴ്സ് ആരാധകസമൂഹമായ മഞ്ഞപ്പടയുടെ പ്രതിനിധി സോമു പി.ജോസഫും സംസാരിക്കുന്നു.
∙ നെവര്‍ ഗീവ് അപ്പ്
ജോ പോൾ അഞ്ചേരി: കളി തോറ്റു നിന്നാലും തിരിച്ചടിക്കാനുള്ള കഴിവാണ് ഈ സീസണിൽ കേരള ബ്ലാസ്റ്റേഴ്സിനെ വ്യത്യസ്തരാക്കുന്നത്. ജയിച്ചു തന്നെ പോകാൻ സാധിക്കും. പക്ഷേ തിരിച്ചുവരാൻ സാധിക്കുന്ന ടീമാണ് യഥാർഥ ചാംപ്യന്മാർ. പ്രതിസന്ധികളിൽ അവർ തളരില്ല.
സോമു പി.ജോസഫ്: തോൽക്കാൻ മനസ്സില്ല എന്ന ഒരു പെരുമാറ്റ ശൈലി ടീമിൽ കാണുന്നു. അതാണ് ഞങ്ങൾക്ക് ഏറെ സന്തോഷം തരുന്നത്. നെവർ ഗീവ് അപ്പ് എന്നാണ് ടീമിന്റെ മുദ്രാവാക്യം. സ്ഥിരതയാർന്ന പ്രകടനമാണ് ഇൗ വർഷം നടത്തുന്നത്.
∙ ഗോളടിക്കും; പിടിച്ചു നിൽക്കും
ജോപോൾ അഞ്ചേരി: സ്കോറിങ് കൂടി എന്നതാണ് ഞാൻ കാണുന്ന ഒരു പോസിറ്റീവ് കാര്യം. വിദേശ താരങ്ങളും ഇന്ത്യൻ താരങ്ങളും ഗോൾ കണ്ടെത്തുന്നു. ഗോൾ അടിക്കുന്നതിനൊപ്പം വഴങ്ങാതെ പിടിച്ച നിൽക്കുന്നു. പരിശീലകൻ വുക്കോമനോവിച് ടീമിനെ ഒറ്റ യൂണിറ്റാക്കി മാറ്റുന്നതിൽ വിജയിച്ചു കഴിഞ്ഞു. ഒത്തൊരുമ ടീമിന്റെ മുഖമുദ്രയായി.
സോമു പി.ജോസഫ്: നമ്മുടെ ഗോൾകീപ്പർ പ്രഭ്സുഖൻ ഗിൽ ഗോൾ‍ഡൻ ഗ്ലൗ അവാർഡിന്റെ പട്ടികയിൽ മുൻപിലാണ്. ഇതു കാണിക്കുന്നത് ഗോൾ അടിക്കുന്നതിനൊപ്പം വഴങ്ങാതെ നിൽക്കാനുള്ള മിടുക്കാണ്. എടികെയ്ക്ക് എതിരായ ആദ്യ മത്സരത്തിൽ മാത്രമാണ് ടീം ഗോളുകൾ ഒരുപാട് വാങ്ങുന്നതായി തോന്നിയത്. ബാക്കിയൊക്കെ അടിക്ക് തിരിച്ചടിയാണ്.
∙ ഐഎസ്എൽ ഒരു ലീഗ് ആയി
ജോപോൾ അഞ്ചേരി: ശരിക്കും ഒരു വിദേശ ലീഗിന്റെ മാതൃകയിലേക്ക് ഐഎസ്എൽ എത്തിക്കഴിഞ്ഞു. പോയിന്റ് ടേബിൾ നോക്കൂ. എട്ടാമത് നിൽക്കുന്ന ടീം വരെ ഒന്നോ രണ്ടോ മത്സരത്തിൽ വിജയിച്ചാൽ ആദ്യ നാലിൽ എത്തുന്ന തരത്തിൽ അത്ര ക്ലോസ് ആയാണു മുന്നോട്ടു പോകുന്നത്. മത്സരങ്ങൾ കൂടുതൽ കടുക്കും. അതാണു ലീഗുകളുടെ സൗന്ദര്യം. എഎഫ്സി ചാംപ്യൻസ് ലീഗിലേക്ക് എൻട്രി കിട്ടും എന്നതു കൂടി വന്നതോടെ പോയിന്റ് പട്ടികയിൽ ഒന്നാമതെത്താൻ എല്ലാ ടീമുകളും അത്യധ്വാനം ചെയ്യുന്നുണ്ട്.
സോമു പി.ജോസഫ്: അടുത്ത 10 മാച്ചുകളിൽ 10–13 പോയിന്റ് നേടിയാൽ കേരള ബ്ലാസ്റ്റേഴ്സിനു പ്ലേ ഓഫ് സാധ്യത കാണുന്നുണ്ട്. എല്ലാ ടീമുകളും പോയിന്റ് പട്ടികയിൽ വളരെ അടുത്താണ്.
∙ അഭിമാനം ഈ ടീം
ജോപോൾ അഞ്ചേരി: തീർച്ചയായും അഭിമാനിക്കാവുന്ന പ്രകടനമാണ് ഐഎസ്എല്ലിൽ കേരള ബ്ലാസ്റ്റേഴ്സ് നടത്തുന്നത്. ഇത്ര സീസൺ എത്തിയെങ്കിലും ആദ്യമായാണ് പോയിന്റ് പട്ടികയിൽ ഒന്നാം സ്ഥാനത്ത് കാണുന്നത്. അത് ചരിത്രമാണ്. ചിലപ്പോൾ മണിക്കൂറുകളുടെ വ്യത്യാസത്തിൽ അടുത്ത ടീം ഒന്നാമത് എത്തുമായിരിക്കാം. പക്ഷേ ചരിത്രം സ്ഥാപിച്ചു കഴിഞ്ഞു. ഇനി അത് നിലനിൽക്കും. ഈ പ്രകടനം മുന്നോട്ട് കൊണ്ടു പോകും എന്നാണ് പ്രതീക്ഷ.
സോമു പി.ജോസഫ്: കൊച്ചിയിൽ ആയിരുന്നു ഈ ഒന്നാം സ്ഥാനത്തേക്ക് എത്തിയ മത്സരം വേണ്ടിയിരുന്നത്. ആരാധകർ എങ്ങനെ ആഘോഷിക്കുമെന്ന് പ്രവചിക്കാൻ സാധിക്കില്ല. എത്ര ഗോളിനാ തോറ്റത് എന്നു കളിയാക്കിയവര്‍ ഇന്നു ജയിച്ചോ എന്ന് ആകാംക്ഷയോടെ ചോദിച്ചു തുടങ്ങി. ട്രോളിയവർ കയ്യടിക്കുന്നു. അതൊക്കെ മതി ഞങ്ങൾ ആരാധകർക്ക്. സീസൺ ചെല്ലുംതോറും മഞ്ഞപ്പട കൂടുതൽ ഉത്തരവാദിത്തമുള്ളവരായി. മികച്ച കളിയാണ് ടീമിന്റെ വിശ്വസ്തരായ ആരാധകരായ ഞങ്ങൾക്കു വേണ്ടത്.
∙ ബ്ലാസ്റ്റേഴ്സ് പ്ലസ്
ഈ സീസണിൽ ബ്ലാസ്റ്റേഴ്സിന്റെ പ്രത്യേകതകൾ
∙ ഏറ്റവും കുറവ് തോൽവി വഴങ്ങിയ ടീം
ഒരു മത്സരം മാത്രമാണ് ബ്ലാസ്റ്റേഴ്സ് ഇതു വരെ തോറ്റത്. നാലു മത്സരങ്ങൾ ജയിച്ചു. 5 എണ്ണത്തിൽ സമനിലയിൽ പിരിഞ്ഞു.
∙ പോസിറ്റീവ് ബ്ലാസ്റ്റേഴ്സ്
ഗോൾ അടിക്കുന്നതിനൊപ്പം വഴങ്ങാതിരിക്കാനും കേരള ബ്ലാസ്റ്റേഴ്സിന് സാധിക്കുന്നു. 16 ഗോൾ അടിച്ചപ്പോൾ വഴങ്ങിയത് 10 ഗോൾ മാത്രം. ഗോൾ വ്യത്യാസം +6. ഐഎസ്എല്ലിൽ ആദ്യമായാണ് ബ്ലാസ്റ്റേഴ്സിന്റെ ഗോൾ ശരാശരിയിൽ പോസിറ്റീവ് ആയി നിൽക്കുന്നത്.
∙ ഇന്ത്യൻ, ഫോറിൻ ഗോൾ
ഗോളടിക്കുന്നതില്‍ വിദേശ താരങ്ങൾക്കൊപ്പം ഇന്ത്യൻ താരങ്ങളും മികച്ചു നിൽക്കുന്നു. സഹൽ, പ്രശാന്ത് അടക്കമുള്ള താരങ്ങൾ ഗോളുകൾ കണ്ടെത്തുന്നു.
∙ മുമ്പന്മാരെ മുട്ടുകുത്തിച്ചു
‘ഏതെങ്കിലും 10 പേരെ തല്ലി ഡോണായവനല്ല ഞാൻ, ഞാൻ തല്ലിയ 10 പേരും ഡോണുമാരാണെ’ന്ന കെജിഎഫ് ഡയലോഗ് പോലെയാണ് കേരള ബ്ലാസ്റ്റേഴ്സ്. ആദ്യ സ്ഥാനത്തുള്ള ടീമുകളായ മുംബൈ, ഹൈദരാബാദ് തുടങ്ങിയ ടീമുകളെ ബ്ലാസ്റ്റേഴ്സ് പരാജയപ്പെടുത്തി. മുൻകാല ചാംപ്യനായ ചെന്നൈയിൻ സിറ്റിയും ബ്ലാസ്റ്റേഴ്സിന്റെ ചൂടറിഞ്ഞു.
English Summary: Rising of Kerala Blasters FC as Table Toppers in ISL 2021-22
