കെയ്ൻ മ്യൂണിക് ! ഗോളടിച്ചും ഗോളടിപ്പിച്ചും ഹാരി കെയ്ൻ; ബയൺ മ്യൂണിക്കിന് ജയം (4–0)

ബർലിൻ ∙ ജർമൻ ബുന്ദസ്‌ലിഗയിൽ ഹാരി കെയ്ന്റെ ‘ഗോളടി സീസണിനു’ തുടക്കം. ഇംഗ്ലിഷ് താരം ഗോളടിച്ചും ഗോളടിപ്പിച്ചും തിളങ്ങിയ സീസണിലെ ആദ്യ മത്സരത്തിൽ വെർഡർ‌ ബ്രെമനെതിരെ ബയണിന് 4–0 ജയം. 

  4–ാം മിനിറ്റിൽ ലിറോയ് സാനെയുടെ ആദ്യ ഗോളിനു വഴിയൊരുക്കിയ കെയ്ൻ 74–ാം മിനിറ്റിൽ ഗോളും നേടി. സാനെ പിന്നീട് 90–ാം മിനിറ്റിലും ലക്ഷ്യം കണ്ടു. ഇൻജറി ടൈമിൽ മാത്തിസ് ടെൽ ബയണിന്റെ ഗോളടി പൂർത്തിയാക്കി.

കഴിഞ്ഞ ദിവസം കെയ്ൻ ക്ലബ്ബിനായി അരങ്ങേറിയ ജർമൻ സൂപ്പർ കപ്പ് മത്സരത്തിൽ ബയൺ 3–0ന് ലൈപ്സീഗിനോടു തോറ്റിരുന്നു. എന്നാൽ ഇന്നലെ ചാംപ്യൻമാർക്കു ചേർന്ന വിധമായിരുന്നു ബയണിന്റെ കളി. 73 ശതമാനം പന്തവകാശം നേടിയ മത്സരത്തിൽ 25 ഷോട്ടുകളാണ് ബയൺ പായിച്ചത്. അതിൽ പത്തും ഗോൾമുഖത്തേക്കു തന്നെ. 

English Summary : Werder Bremen vs Bayern Munich match update