യൂറോകപ്പ് യോഗ്യത ഉറപ്പിച്ച് ബൽജിയം, ഫ്രാൻസ്, പോർച്ചുഗൽ

പാരിസ് ∙ ഇരട്ടഗോളുകളോടെ പോർച്ചുഗലിനെയും ഫ്രാൻസിനെയും യൂറോ കപ്പിലേക്കു നയിച്ച് ക്രിസ്റ്റ്യാനോ റൊണാൾഡോയും കിലിയൻ എംബപെയും. ഇന്നലെ സ്‌ലൊവാക്യയെ 3–2ന് തോൽപിച്ചതോടെ പോർച്ചുഗൽ ജെ ഗ്രൂപ്പി‍ൽ ഒന്നാം സ്ഥാനത്ത് ലീഡ് 7 പോയിന്റാക്കി. ഗോൺസാലോ റാമോസാണ് പോർച്ചുഗലിന്റെ ആദ്യ ഗോൾ നേടിയത്. 29 (പെനൽറ്റി), 72 മിനിറ്റുകളിൽ ക്രിസ്റ്റ്യാനോയും ലക്ഷ്യം കണ്ടു. രാജ്യാന്തര ഫുട്ബോളിൽ ഇതോടെ ക്രിസ്റ്റ്യനോയ്ക്ക് 125 ഗോളുകളായി. ഇതുവരെയുള്ള 7 മത്സരങ്ങളും ജയിച്ചാണ് പോർച്ചുഗൽ അടുത്ത വർഷം ജർമനിയിൽ നടക്കുന്ന ടൂർണമെന്റിന് യോഗ്യത ഉറപ്പിച്ചത്. ബി ഗ്രൂപ്പിൽ നെതർലൻഡ്സിനെ 2–1നു തോൽപിച്ചാണ് ഫ്രാൻസ് യോഗ്യത നേടിയത്. 7, 53 മിനിറ്റുകളിലായിരുന്നു എംബപെയുടെ ഗോളുകൾ.  ഓസ്ട്രിയയെ 3–2നു മറികടന്ന് ബൽജിയവും യോഗ്യത ഉറപ്പിക്കുന്ന ആദ്യ ടീമുകളിലൊന്നായി.