വിജയവഴിയിലേക്കു തിരിച്ചെത്തി ആർസനൽ; ക്രിസ്റ്റൽ പാലസിനെ 5–0ന് തകർത്തു

ലണ്ടൻ ∙ ഇംഗ്ലിഷ് പ്രിമിയർ ലീഗ് ഫുട്ബോളിൽ ഉജ്വലമായി വിജയവഴിയിലേക്കു തിരിച്ചെത്തി ആർസനൽ. ക്രിസ്റ്റൽ പാലസിനെ 5–0നാണ് ഗണ്ണേഴ്സ് തകർത്തുവിട്ടത്. ഇൻജറി ടൈമിൽ ഗബ്രിയേൽ മാർട്ടിനല്ലി ഇരട്ടഗോൾ നേടി. ഗബ്രിയേൽ, ലിയാൻഡ്രോ ട്രൊസാർഡ് എന്നിവരാണ് മറ്റു സ്കോറർമാർ. 37–ാം മിനിറ്റിൽ പാലസ് താരം ഡീൻ ഹെൻഡേഴ്സൻ സെൽഫ് ഗോൾ വഴങ്ങി.

സീസണിൽ തുടരെ 3 തോൽവികൾക്കു ശേഷമാണ് ആർസനലിന്റെ ഈ വിജയം. 43 പോയിന്റോടെ മൂന്നാം സ്ഥാനത്താണ് ആർസനൽ ഇപ്പോൾ. മാഞ്ചസ്റ്റർ സിറ്റി (43), ലിവർപൂൾ (45) എന്നിവരാണ് മുന്നിലുള്ളത്.