ഇന്റർ മിലാന് ഇറ്റാലിയൻ ലീഗ് കിരീടം

റോം ∙ ആവേശപ്പോരാട്ടത്തിൽ എസി മിലാനെ 2–1നു തോൽപിച്ച് ഇന്റർ മിലാൻ ഇറ്റാലിയൻ സീരി എ ഫുട്ബോൾ കിരീടജേതാക്കളായി. ഇന്ററിന്റെ 20–ാം കിരീടമാണിത്. 5 മത്സരങ്ങൾ കൂടി ബാക്കിനിൽക്കെ, 2–ാം സ്ഥാനക്കാരായ എസി മിലാനുമായി 17 പോയിന്റ് വ്യത്യാസത്തിലാണ് ഇന്ററിന്റെ കിരീടധാരണം. ഇൻജറി ടൈമിൽ 2 മിലാൻ താരങ്ങളും ഒരു ഇന്റർ താരവും ചുവപ്പുകാർഡ് കണ്ട മത്സരത്തിൽ ഫ്രാൻസെസ്കോ അസർബി, മാർക്കസ് തുറാം എന്നിവരാണ് ഇന്ററിന്റെ ഗോളുകൾ നേടിയത്. ഫികായോ ടൊമോറി എസി മിലാന്റെ ആശ്വാസ ഗോൾ നേടി. തിയോ ഹെർണാണ്ടസ്, ഡേവിഡ് കലാബ്രിയ എന്നിവരാണു മാർച്ചിങ് ഓർഡർ ലഭിച്ച എസി മിലാൻ കളിക്കാർ. ഇന്ററിന്റെ ഡെൻസൽ ഡുംഫ്രിസിനും ചുവപ്പുകാർഡ് കണ്ടു പുറത്തു പോകേണ്ടി വന്നു.