പുനിയയ്ക്ക് സ്വർണം, അഭിനന്ദന് സമർപ്പിച്ചു

ന്യൂഡൽഹി∙ ബൾഗേറിയയിലെ റൂസിൽ നടന്ന ഡാൻ കൊളോവ്– നിക്കോള പെട്രോവ ഗുസ്തി ടൂർണമെന്റിൽ ഇന്ത്യൻ താരം ബജ്‌രംഗ് പുനിയയ്ക്കു സ്വർണം. ഇന്ത്യൻ എയർ ഫോഴ്സ് വിങ് കമാൻഡർ അഭിനന്ദൻ വർധമാന് ഈ സ്വർണം സമർപ്പിക്കുന്നുവെന്ന് പുനിയ പറഞ്ഞു. ലോക ചാംപ്യൻഷിപ്പ് വെള്ളി മെഡൽ ജേതാവായ പുനിയ യുഎസ്എ താരം ജോർദാൻ ഒളിവറിനെ 12–3ന് കീഴ്പ്പെടുത്തിയാണു സ്വർണത്തിലെത്തിയത്. ടൂർണമെന്റിൽ നിന്നു പരമാവധി റാങ്കിങ് പോയിന്റുകളും പുനിയ സ്വന്തമാക്കി.

‘‘ ഈ സ്വർണം വിങ് കമാൻഡർ അഭിനന്ദനു സമർപ്പിക്കുന്നു. അദ്ദേഹമാണ് എന്റെ പോരാട്ടത്തിനു പ്രചോദനം. അദ്ദേഹത്തെ നേരിൽക്കണ്ട് കൈകൊടുക്കണം.’’– പുനിയ ട്വീറ്റ് ചെയ്തു. കോമൺവെൽത്ത് ഗെയിംസ്, ഏഷ്യൻ ഗെയിംസ് സ്വർണം നേടിയ പുനിയ കഴിഞ്ഞ 5 ടൂർണമെന്റുകളിൽ നിന്നായി ഒരു വെള്ളിയും 4 സ്വർണവും നേടിയിട്ടുണ്ട്.

പാരിസിൽ 2017ൽ നടന്ന ലോക ചാംപ്യൻഷിപ്പിനു യോഗ്യത നേടാൻ കഴിയാതിരുന്ന പുനിയ അതിനു ശേഷം പങ്കെടുത്ത 10 ടൂർണമെന്റുകളിൽ നിന്നായി 10 മെഡൽ നേടി. നേരത്തെ പൂജ ധൻഡ 59 കിലോഗ്രാം വിഭാഗത്തിൽ സ്വർണം നേടി. സന്ദീപ് ടോമർ 61 കിലോഗ്രാം വിഭാഗത്തിൽ വെള്ളി സ്വന്തമാക്കി.