സാന്താക്ലോസിനോട് നമ്മുടെ കായിക താരങ്ങൾക്കു ചോദിക്കാനുള്ളതെന്താകും?
Mail This Article
വി.കെ.വിസ്മയ(അത്‌ലീറ്റ്)- ടോക്കിയോ ഒളിംപിക്സിൽ പോഡിയം ഫിനിഷിന് അവസരം ഒരുക്കിത്തരണം. ചെറിയ ആഗ്രഹമല്ലെന്നറിയാം, എന്നാലും...!
സഞ്ജു സാംസൺ(ഇന്ത്യൻ ക്രിക്കറ്റ് താരം)- പൂർണമനസ്സോടെ ഒരു ലക്ഷ്യത്തിനായി കഠിനാധ്വാനം ചെയ്യുന്ന എല്ലാവർക്കും അവർ ആഗ്രഹിക്കുന്നതു ലഭിക്കാൻ സാന്താ അനുഗ്രഹിക്കണം!
ജിൻസൻ ജോൺസൻ (അത്‌ലീറ്റ്)-അമേരിക്കയിലെ തണുപ്പത്ത് ക്രിസ്മസ് ആഘോഷിക്കേണ്ട ഞാൻ പരുക്കുമായി കോഴിക്കോട് ചക്കിട്ടപാറയിലെ വീട്ടിലിരുപ്പാണ്. ഈ പരുക്ക് മാറി ഒളിംപിക്സിൽ പങ്കെടുക്കണം. അതാണ് എന്റെ ആവശ്യം.
മാർക്കസ് ജോസഫ്(ഗോകുലം കേരള എഫ്സിയുടെ ട്രിനിഡാഡ് ആൻഡ് ടുബാഗൊ താരം)- ഈ സീസണിൽ കുറഞ്ഞത് 30 ഗോളുകൾ. ഞാൻ ഇത്രയും ഗോളടിച്ചാൽ പോരെന്നാണ് മക്കൾ പറയുന്നത്. അവർക്കു വേണ്ടിയാണ്...!
ഐ.എം.വിജയൻ(ഇന്ത്യൻ ഫുട്ബോൾ ടീം മുൻ ക്യാപ്റ്റൻ)-നടക്കാനിടയ‍ില്ലാത്ത ഒരാഗ്രഹമാണ്, ഐ.എം.വിജയൻ എന്ന പേരിൽ ലോകകപ്പ് കളിക്കാനൊരവസരം! ഇന്ത്യൻ ജഴ്സിയിൽ ഒറ്റത്തവണ, ഒരേയൊരു വട്ടമെങ്കിലും ലോകകപ്പ് മൈതാനത്തു കളിക്കാനിറങ്ങാൻ കഴിഞ്ഞെങ്കിൽ...
പി.ആർ.ശ്രീജേഷ് (ഇന്ത്യൻ ഹോക്കി താരം)-അടുത്ത ഒളിംപിക്സിൽ ഹോക്കിയിൽ ഇന്ത്യയ്ക്ക് ഒരു മെഡൽ.
ജോപോൾ അഞ്ചേരി(മുൻ ഇന്ത്യൻ ഫുട്ബോൾ താരം)-ഫ്രാൻസ് ഫുട്ബോൾ ടീം മുൻ ക്യാപ്റ്റനും ഇപ്പോൾ റയൽ മഡ്രിഡ് കോച്ചുമായ സിനദിൻ സിദാനൊപ്പം ഒരു മത്സരത്തിലുടനീളം ഒന്നിച്ചു കളിക്കാനൊരവസരം, അത്രയും മതി!
എച്ച്.എസ്.പ്രണോയ്(ബാഡ്മിന്റൻ താരം)-അടുത്ത ഒരു വർഷം മുഴുവൻ പരുക്കിന്റെ അലട്ടലില്ലാതെ കളിക്കാൻ അവസരം. അതു മാത്രമാണ് ആഗ്രഹം.
