റെക്കോർഡ് ലാപ്പിലേക്ക് ഹാമിൽട്ടൻ

കോവിഡ് ഭീതിയെ പിന്നിലാക്കി ആവേശത്തിന്റെ സർക്യൂട്ടിലാണിപ്പോൾ ഫോർമുല വൺ. എഫ് വൺ കാറോട്ടപ്പോരിലെ തകർക്കാൻ കഴിയില്ലെന്നു കരുതിയ പല റെക്കോർഡുകളും ഈ സീസണിൽ പഴങ്കഥയാകുമെന്നുറപ്പ്. നിലവിലെ ചാംപ്യൻ മെഴ്സിഡീസ് ഡ്രൈവർ ലൂയിസ്‍ ഹാമിൽട്ടൻ ഫോർമുല വൺ ഇതിഹാസം മൈക്കൽ ഷൂമാക്കറുടെ മറ്റൊരു നേട്ടവും എത്തിപ്പിടിക്കാനൊരുങ്ങുന്നു. 

കരിയറിൽ ഏറ്റവും കൂടുതൽ വിജയങ്ങളെന്ന ഷൂമാക്കറുടെ (91) റെക്കോർഡിനൊപ്പമെത്താൻ ഇനി ഹാമിൽട്ടനു വേണ്ടത് ഒരേയൊരു ജയം. ഇറ്റലിയിലെ മുഗല്ലോയിൽ കഴിഞ്ഞ ദിവസം നടന്ന ടസ്കൻ ഗ്രാൻപ്രിയിൽ ഒന്നാമതെത്തിയതോടെ ഇംഗ്ലിഷ് താരത്തിനു 90 വിജയങ്ങളായി. 27നു സോച്ചിയിൽ റഷ്യൻ ഗ്രാൻപ്രിയിൽ വിജയിച്ചാൽ ഇതിഹാസത്തിനൊപ്പം ഏറ്റവും കൂടുതൽ‌ വിജയങ്ങളുടെ സിംഹാസനത്തിലേറാം. ഈ സീസണിൽ കിരീടം നേടിയാൽ 7 എഫ് വൺ കിരീടങ്ങളെന്ന ഷൂമാക്കറുടെ റെക്കോർഡിനൊപ്പവും ഹാമിൽട്ടനെത്താം.

27 വ്യത്യസ്ത സർക്യൂട്ടുകളിൽ വിജയം നേടുന്ന ആദ്യ താരമെന്ന ബഹുമതിയും ടസ്കൻ ജയത്തോടെ ഹാമിൽട്ടനു സ്വന്തമായി. ഫോർമുല വണ്ണിൽ തിരിച്ചെത്തിയ ശേഷമുള്ള മെഴ്സിഡീസിന്റെ 100–ാം വിജയവുമായിരുന്നു അത്.