വീണ്ടും ഹാമിൽട്ടൻ; മെഴ്സിഡീസിന് 7–ാം കിരീടം

ഇമോള (ഇറ്റലി) ∙ ഫോർമുല വണിൽ 93–ാം വിജയവുമായി ലൂയിസ് ഹാമിൽട്ടൻ. ഇന്നലെ നടന്ന എമിലിയ റൊമാഗ്ന ഗ്രാൻപ്രിയിൽ പോളിൽ മത്സരം തുടങ്ങിയ മെഴ്സിഡീസ് താരം വൾട്ടേരി ബൊത്താസിനെ 5.783 സെക്കൻഡുകൾക്കു പിന്നിലാക്കിയാണു ഹാമിൽട്ടൻ സീസണിലെ 9–ാം വിജയം നേടിയത്. ഒന്നും രണ്ടും സ്ഥാനങ്ങൾ ലഭിച്ചതോടെ മെഴ്സിഡീസ് തുടർച്ചയായ 7–ാം കൺസ്ട്രക്ടേഴ്സ് ചാംപ്യൻഷിപ് നേടിയെടുത്തു. റെനോ താരം ഡാനിയൽ റിക്കാർഡിയോ മൂന്നാമതെത്തി. വേഗമേറിയ ലാപ്പിന് ഒരു ബോണസ് പോയിന്റ് കൂടി ലഭിച്ചതോടെ ഹാമിൽട്ടന്റെ ചാംപ്യൻഷിപ് ലീഡ് 85 പോയിന്റായി. 4 മത്സരങ്ങൾ മാത്രം ശേഷിക്കെ രണ്ടാഴ്ചയ്ക്കപ്പുറം നടക്കുന്ന ടർക്കിഷ്  ഗ്രാൻപ്രിയിൽ ഹാമിൽട്ടന് 7–ാം കിരീടം ഉറപ്പിക്കാനുള്ള സാധ്യത തെളിഞ്ഞു.

English Summary: F1 2020: Hamilton wins as Mercedes claim 7th constructors’ championship at Imola