ദേശീയ സീനിയർ വോളി: ഹാട്രിക് തേടി കേരളം
Mail This Article
ഭുവനേശ്വർ ∙ ദേശീയ സീനിയർ വോളിബോളിൽ വനിതാ വിഭാഗത്തിൽ കേരളം ഫൈനലിൽ. സെമിയിൽ ഹിമാചൽ പ്രദേശിനെ തകർത്താണു കേരളത്തിന്റെ ഫൈനൽ പ്രവേശം. പുരുഷ സെമിയിൽ കേരളം അസമിനോടു തോറ്റു.
25–17, 25–15, 25–9 എന്ന സ്കോറിലാണു ഹിമാചലിനെതിരെ കേരള വനിതകളുടെ വിജയം. കഴിഞ്ഞ 2 തവണയും ജേതാക്കളായ കേരളം ഇന്നു ഹാട്രിക് കിരീടമാണു ലക്ഷ്യമിടുന്നത്. ഇന്നലെ രാവിലെ നടന്ന ക്വാർട്ടറിൽ കർണാടകയെ തകർത്താണു കേരളം സെമിയിൽ കടന്നത് (സ്കോർ: 25–8, 25–14, 25–13). സെമിയിൽ അറ്റാക്കർമാരായ കെ.പി.അനുശ്രീ, എൻ.എസ്.ശരണ്യ, ബ്ലോക്കർ അഞ്ജുമോൾ, സെറ്റർ കെ.എസ്.ജിനി, മായാ തോമസ് എന്നിവരുടെ മികച്ച പ്രകടനമാണു കേരളത്തിന്റെ ജയം അനായാസമാക്കിയത്.
ഇന്നലെ രാവിലെ നടന്ന ക്വാർട്ടറിൽ രാജസ്ഥാനെ 3 സെറ്റുകളിൽ മറികടന്ന കേരളത്തിന്റെ പുരുഷ ടീമിനു (25–18, 25–17, 25–16) പക്ഷേ, സെമിയിൽ അസമിനെതിരെ കാലിടറി. ആദ്യ 2 സെറ്റുകൾ നേടിയെങ്കിലും പിന്നീടുവന്ന 3 സെറ്റുകളും നഷ്ടപ്പെടുത്തി കേരളം മത്സരം തോറ്റു. സ്കോർ: 25–13, 25–20, 22–25, 16–25, 11–15.
Content Highlights: National senior Volleyball