സിംഗപ്പുർ ഓപ്പൺ: സൈന, സിന്ധു, പ്രണോയ് ക്വാർട്ടറിൽ

സിംഗപ്പുർ ∙ തിരിച്ചുവരവിന്റെ തകർപ്പൻ അടയാളങ്ങളുമായി സൈന നെഹ്‌വാൾ സിംഗപ്പുർ ഓപ്പൺ ബാഡ്മിന്റൻ ക്വാർട്ടർ ഫൈനലിൽ. ചൈനയുടെ ലോക 9–ാം നമ്പർ താരം ഹി ബിങ് ജിയാവോയെ സൈന കീഴടക്കി. സ്കോർ: 21-19,11-21, 21-17. 

പരുക്കും പ്രശ്നങ്ങളും കാരണം കഴിഞ്ഞ കുറെക്കാലമായി മങ്ങിയ ഫോമിലായിരുന്ന മുപ്പത്തിരണ്ടുകാരി സൈന ഒരു സൂപ്പർ 500 ചാംപ്യൻഷിപ്പിന്റെ ക്വാർട്ടറിലെത്തുന്നത് രണ്ടര വർഷത്തിനിടെ ആദ്യമായാണ്. 

വനിതാ സിംഗിൾസിൽ പി.വി. സിന്ധുവും പുരുഷ സിംഗിൾസിൽ മലയാളി താരം എച്ച്.എസ്. പ്രണോയിയും ക്വാർട്ടറിലെത്തി. വിയറ്റ്നാം താരം തുയ് ലിൻ ഗുയെനെ 19-21, 21-19, 21-18നു തോൽപിച്ചാണ് പി.വി.സിന്ധു മുന്നേറിയത്.  ലോക 4–ാം നമ്പർ ചൈനീസ് തായ്‌പേയ് താരം ചൗ ടിയെൻ ചെന്നിനെ 14-21, 22-20, 21-18നു തോൽപിച്ചാണ് പ്രണോയ് ക്വാർട്ടറിലെത്തിയത്. 

പുരുഷ ഡബിൾസിൽ മലയാളി താരം എം.ആർ. അർജുനും ധ്രുവ് കപിലയും മലേഷ്യയുടെ ഗോഗ് സീ ഫെയ്– നൂർ ഇസ്സുദ്ദീൻ സഖ്യത്തെ തോൽപിച്ചു (18-21, 24-22, 21-18).