ദേശീയ ജൂനിയർ സ്കൂൾ ഗെയിംസ് റദ്ദാക്കി

പാലക്കാട് ∙ പട്നയിൽ ഫെബ്രുവരി 2 മുതൽ 5 വരെ നടത്താനിരുന്ന ദേശീയ ജൂനിയർ സ്കൂൾ ഗെയിംസ് റദ്ദാക്കി. ഗെയിംസ് റദ്ദാക്കാനുള്ള കാരണം സ്കൂൾ ഗെയിംസ് ഫെഡറേഷൻ ഓഫ് ഇന്ത്യ വ്യക്തമാക്കിയിട്ടില്ല. ഇതോടെ ഇന്നലെ മുതൽ 29 വരെ കുന്നംകുളത്തു നടത്താനിരുന്ന കേരള ടീമിന്റെ പരിശീലന ക്യാംപും മാറ്റി.

36 ആൺകുട്ടികളും 33 പെൺകുട്ടികളും 10 ഒഫിഷ്യൽസും അടങ്ങുന്ന കേരള ടീം കിരീടം ലക്ഷ്യമിട്ട് ഒരുങ്ങുന്നതിനിടെയാണു ഗെയിംസ് റദ്ദാക്കിയതായി വിവരം ലഭിച്ചത്. ടീമിലെ മിക്കവരും എസ്എസ്എൽസി വിദ്യാർഥികളാണ്. ദേശീയ സ്കൂൾ സീനിയർ, സബ് ജൂനിയർ ചാംപ്യൻഷിപ്പുകൾ നേരത്തേ നടന്നിരുന്നു. സീനിയർ വിഭാഗത്തിൽ കേരളത്തിനാണു കിരീടം.