ഗ്രീക്ക് താരം സ്റ്റെഫാനോസ് സിറ്റ്സിപാസിന് എടിപി ഫൈനൽസ് ടെന്നിസ് കിരീടം

ലണ്ടൻ ∙ ഗ്രീക്ക് താരം സ്റ്റെഫാനോസ് സിറ്റ്സിപാസിന് എടിപി ഫൈനൽസ് ടെന്നിസ് ചാംപ്യൻഷിപ് കിരീടം. ഫൈനലിൽ ഓസ്ട്രിയൻ താരം ഡൊമിനിക് തീമിനെയാണ് സിറ്റ്സിപാസ് തോൽപിച്ചത് (6–7,6–2,7–6). 2001ൽ ജേതാവായ ലെയ്ട്ടൻ ഹെവിറ്റിനു ശേഷം കിരീടം ചൂടുന്ന പ്രായം കുറഞ്ഞ താരമാണ് 21കാരനായ സിറ്റ്സിപാസ്.

കഴിഞ്ഞ വർഷം നെക്സ്റ്റ് ജെൻ എടിപി ഫൈനൽസിലും സിറ്റ്സിപാസ് ജേതാവായിരുന്നു. ഫെഡറർ–നദാൽ–ജോക്കോവിച്ച് എന്നിവരെയും തന്റെ തലമുറയിലുള്ള ഡാനിൽ മെദ്‌വദെവ്, അലക്സാണ്ടർ സ്വെരേവ്, ഡൊമിനിക് തീം എന്നിവരെയും മറികടന്നു നേടിയ ജയം അടുത്ത സീസണിൽ സിറ്റ്സിപാസിന് വലിയ ആത്മവിശ്വാസമേകും.