ഗ്രാൻസ്ലാം മുതൽ ചാനൽസ്ലാം വരെ; കിരീട വിജയങ്ങളുടെ വ്യത്യസ്തമായ പേരുകൾ
Mail This Article
ടെന്നിസിലെ 4 മേജർ ട്രോഫികളായ ഓസ്ട്രേലിയൻ ഓപ്പൺ, ഫ്രഞ്ച് ഓപ്പൺ, വിമ്പിൾഡൻ, യുഎസ് ഓപ്പൺ എന്നിവയാണ് ഗ്രാൻസ്ലാം എന്നറിയപ്പെടുന്നത്. വിവിധ ഘട്ടങ്ങളിലായി ഇവ നേടുന്നതിന് വ്യത്യസ്തമായ പേരുകളുമുണ്ട്. അവയിങ്ങനെ:
കലണ്ടർ സ്ലാം: ഒരു കലണ്ടർ വർഷം തന്നെ 4 ഗ്രാൻസ്ലാം കിരീടങ്ങൾ.
നോൺ–കലണ്ടർ സ്ലാം: ഒരു കലണ്ടർ വർഷത്തിൽ അല്ലാതെ തുടരെ 4 ഗ്രാൻസ്ലാം കിരീടങ്ങൾ. സെറീന സ്ലാം എന്നും ഇതറിയപ്പെടുന്നു. (2 തവണ യുഎസ് താരം സെറീന വില്യംസ് ഇതു നേടിയിട്ടുള്ളതിനാലാണ് ഈ പേര്)
ഗോൾഡൻ സ്ലാം: കലണ്ടർ സ്ലാമും ഒപ്പം അതേ വർഷം തന്നെ ഒളിംപിക്സ് സ്വർണവും.
കരിയർ ഗോൾഡൻ സ്ലാം: കലണ്ടർ വർഷത്തിൽ അല്ലാതെ 4 ഗ്രാൻസ്ലാം കിരീടങ്ങളും ഒളിംപിക് സ്വർണവും.
കരിയർ സ്ലാം: കരിയറിൽ എപ്പോഴെങ്കിലും 4 ഗ്രാൻസ്ലാം കിരീടങ്ങൾ.
സൂപ്പർ സ്ലാം: ഗോൾഡൻ സ്ലാമും വർഷാവസാന ടൂർ ഫൈനൽസ് നേടുന്നത്.
കരിയർ സൂപ്പർ സ്ലാം: കരിയറിൽ 4 ഗ്രാൻസ്ലാം കിരീടങ്ങൾ, ഒളിംപിക് സ്വർണം, വർഷാവസാന ചാംപ്യൻഷിപ് എന്നിവ നേടുന്നത്.
ബോക്സ്ഡ് സെറ്റ്: 4 ഗ്രാൻസ്ലാമുകളിലെയും സിംഗിൾസ്, ഡബിൾസ്, മിക്സ്ഡ് ഡബിൾസ് കിരീടങ്ങൾ കരിയറിൽ തികയ്ക്കുന്നത്.
സർഫസ് സ്ലാം: ഹാർഡ്, ഗ്രാസ്, ക്ലേ കോർട്ടുകളിലെല്ലാം ഒരു വർഷം തന്നെ ഗ്രാൻസ്ലാം കിരീടങ്ങൾ നേടുന്നത്.
ചാനൽ സ്ലാം: ഫ്രഞ്ച് ഓപ്പണും വിമ്പിൾഡനും തുടരെ നേടുന്നത് (ഫ്രാൻസിനെയും യുകെയെയും വേർതിരിക്കുന്ന ഇംഗ്ലിഷ് ചാനലിന്റെ ഓർമയിൽ)
Content Highlight: Tennis