വിംബിൾഡൻ വനിതാ സിംഗിൾസിൽ ഒൻസ് ജാബർ– എലേന റൈബാകിന ഫൈനൽ
Mail This Article
ലണ്ടൻ∙ വിംബിൾഡൻ വനിതാ വിഭാഗം സിംഗിൾസ് ഫൈനലിൽ തുനീസിയയുടെ ഒൻസ് ജാബർ– കസാഖ്സ്ഥാന്റെ എലേന റൈബാകിന പോരാട്ടം. സെമിയില് ജർമൻ താരം തത്യാന മരിയയെ മൂന്നു സെറ്റ് നീണ്ട പോരാട്ടത്തിനൊടുവിലാണ് ജാബർ കീഴടക്കിയത്. സ്കോർ– 6–2, 3–6, 6–1.
ജാബറിന്റെ കരിയറിലെ ആദ്യ ഗ്രാൻഡ്സ്ലാം ഫൈനലാണിത്. ആദ്യ സെറ്റിൽ തകർപ്പൻ പ്രകടനത്തിൽ കളം നിറഞ്ഞത് ജാബിറാണെങ്കില് രണ്ടാം സെറ്റിൽ തത്യാന കളി പിടിച്ചു. മൂന്നാം സെറ്റിൽ എതിരാളിക്ക് സാധ്യതകളൊന്നും നൽകാതെയാണ് (6–1) ജാബർ ഫൈനൽ ഉറപ്പിച്ചത്.
രണ്ടാം സെമിയിൽ എലെന റൈബാകിന റുമാനിയയുടെ സിമോണ ഹാലെപ്പിനെ നേരിട്ടുള്ള സെറ്റുകളിൽ കീഴടക്കി ഫൈനൽ ഉറപ്പിച്ചു. സ്കോർ 6–3, 6–3. റൈബാകിനയുടെയും ആദ്യ ഗ്രാൻഡ് സ്ലാം ഫൈനലാണിത്. 2015 മുതല് ഫൈനലിലെത്തിയ താരങ്ങളിൽ ഏറ്റവും പ്രായം കുറഞ്ഞയാളാണ് റൈബാകിന. 23 വയസ്സാണ് റൈബാകിനയുടെ പ്രായം.
English Summary: Wimbledon 2022: Elena Rybakina Beats Simona Halep To Reach Maiden Grand Slam Final