ശ്വാസകോശത്തിന്റെ ആകൃതിയിൽ സ്വര്‍ണ നെക്‌ലേസ്; കാൻസിൽ തിളങ്ങി ബെല്ല ഹഡീഡ്

അമേരിക്കൻ സൂപ്പർ മോഡൽ ബെല്ല ഹഡീഡിന് പിന്നാലെയാണിപ്പോൾ ഫാഷൻ ലോകം. കാൻസ് ഫിലം ഫെസ്റ്റിവലിന് എത്തിയപ്പോൾ ബെല്ല ധരിച്ച നെക്‌ലേസ് ആണ് ഇതിനു കാരണം. എന്താണീ നെക്‌ലേസിന്റെ പ്രത്യേകതയെന്നല്ലേ ? മനുഷ്യരുടെ ശ്വാസകോശത്തിന്റെ ആകൃതിയിലാണ് ഈ നെക്‌ലേസ് ഒരുക്കിയിരുന്നത്. അതും മാറിടം മറയ്ക്കുന്ന രീതിയിൽ!

ഇറ്റാലിയൻ ആഡംബര ഫാഷൻ ബ്രാൻഡായ Schiaparelli ഒരുക്കിയ ലോങ് ബ്ലാക് ഡ്രസ്സ് ധരിച്ചാണ് ബെല്ല റെഡ് കാർപറ്റിൽ എത്തിയത്. പരമ്പരാഗത ശൈലയിലുള്ള നെക്‌ലൈൻ ഈ വസ്ത്രത്തിന് ഉണ്ടായിരുന്നില്ല. ശ്വാസകോശത്തിന്റെ ആകൃതിയിലുള്ള വമ്പനൊരു സ്വർണ നെക്‌ലേസ് ആണ് മാറിടം മറച്ചിരുന്നത്.

ബെല്ലയുടെ ഈ പരീക്ഷണം നിരവധി അഭിനന്ദനങ്ങള്‍ നേടി. ഏതാനും വർഷമായി കാൻസ് റെഡ് കാർപറ്റിലെ സ്ഥിരം സാന്നിധ്യമാണ് ഈ 24കാരി. മുൻവർഷങ്ങളിലും ബെല്ല ഫാഷന്‍ ലോകത്തിന്റെ ശ്രദ്ധ പിടിച്ചുപറ്റിയിരുന്നു. 

74–ാമത് കാൻസ് ഫിലിം ഫെസ്റ്റിവൽ ആണിത്. മേയിൽ നടക്കേണ്ടിയിരുന്ന ഫെസ്റ്റിവൽ കോവിഡ് പ്രതിസന്ധി മൂലം ജൂലൈയിലേക്ക് മാറ്റുകയായിരുന്നു. 

English Summary : Model Bella Hadid's Cannes 2021 Outfit