വാലന്റൈൻ വീക്കിന് തുടക്കം; ഫെബ്രുവരി 7 – റോസ് ഡേ; പ്രണയം പൂവിടട്ടെ
Mail This Article
വീണ്ടുമൊരു പ്രണയദിനം വരികയാണ്. ഇതുവരെ പ്രണയം പറയാത്തവർക്ക് അതു തുറന്നു പറയാനും, പ്രണയിക്കുന്നവർക്ക് സമ്മാനങ്ങളും സർപ്രൈസുകളും നൽകി പങ്കാളിയെ സന്തോഷിപ്പിക്കാനുമൊക്കെയായി ഒരു വാരം. പ്രണയിക്കാനോ , പ്രണയം പറയാനോ ഒന്നും പ്രത്യേക ദിവസത്തിന്റെ ആവശ്യമില്ല. എന്നാൽ പ്രണയത്തിനും പ്രണയിക്കുന്നവർക്കുമുള്ള ഒരു അംഗീകാരമായാണ് ഈ ദിവസങ്ങളെ പരിഗണിക്കുന്നത്. ഫെബ്രുവരി 7 മുതൽ 14 വരെയാണ് വാലന്റൈൻ വീക്ക്. ഈ ആഴ്ചയിലെ എല്ലാ ദിവസത്തിനും ഓരോ പ്രത്യേകതയുമുണ്ട്. അവ എന്താണെന്നു നോക്കാം.
ഫെബ്രുവരി 7 - റോസ് ഡേ
വാലന്റൈൻ വീക്കിലെ ആദ്യ ദിവസം റോസ് ഡേ എന്നറിയപ്പെടുന്നു. പ്രണയത്തിന്റെ പ്രതീകമായി വിശേഷിപ്പിക്കുന്ന റോസാപുഷ്പം കൈമാറുകയാണ് ഈ ദിവസത്തിൽ ചെയ്യേണ്ടത്. പ്രണയം ഇതുവരെ പറയാത്തവർ പൂക്കൾ നൽകി പ്രണയത്തെക്കുറിച്ച് സൂചിപ്പിക്കണം. പ്രണയമാണെങ്കിൽ ചുവന്ന പൂവാണ് നൽകേണ്ടത്. സുഹൃത്തുക്കൾക്കും തമ്മിലും ഈ ദിവസം പൂവ് കൈമാറാം. മഞ്ഞ റോസാപ്പൂവ് ആണ് ഇതിനായി ഉപയോഗിക്കുന്നത്. പ്രണയത്തിനും സൗഹൃദത്തിനും ഇടയിലൂടെ കടന്നു പോവുകയാണെങ്കിൽ പിങ്ക് നിറത്തിലുള്ള പൂവും നൽകാം. ശത്രുത അവസാനിപ്പിച്ച് സൗഹൃദത്തിന്റെ പാത തുറക്കാനായി വെള്ള റോസാപ്പൂക്കളാണ് നൽകേണ്ടത്.
ഫെബ്രുവരി 8 - പ്രൊപ്പോസ് ഡേ
പൂക്കളുടെ മനോഹാരിതയേക്കാൾ വാക്കുകളുടെ തീവ്രതയും ആർദ്രതയും കൊണ്ട് പ്രണയം പറയാനുള്ള ദിവസമാണിത്. എത്രമാത്രം നിങ്ങൾ അവരെ പ്രണയിക്കുന്നുവെന്ന് നിങ്ങളുടെ പ്രെപ്പോസലിലൂടെ പങ്കാളിക്ക് മനസ്സിലാകണം. വാക്കുകൾ നിങ്ങളുടെ സ്നേഹം പറയട്ടെ.
ഫെബ്രുവരി 9 - ചോക്ലേറ്റ് ഡേ
പ്രണയം മധുരമല്ലേ, അപ്പോൾ ചോക്ലേറ്റ് ഇല്ലാതിരിക്കുമോ ? പ്രണയമാകുന്ന മധുരത്തിന് ചോക്ലേറ്റുകൾ പങ്കുവച്ച് അതിമധുരം സമ്മാനിക്കുന്ന ദിവസമാണിത്. വേദനകളും ആശങ്കളും മാറ്റിവെച്ച് പ്രണയിക്കുന്ന വ്യക്തിയോടൊപ്പം ചോക്ലേറ്റ് പങ്കുവച്ച് ആ ദിവസം ആഘോഷമാക്കാം. വൈവിധ്യമാർന്ന ചോക്ലേറ്റുകള് നിറച്ച പെട്ടികൾ സമ്മാനിച്ച് അന്നേ ദിവസം പ്രണയിനിയെ അദ്ഭുതപ്പെടുത്തുന്നവരും നിരവധിയാണ്.
ഫെബ്രുവരി 10 - ടെഡി ഡേ
ഒരു ക്യൂട്ട് ടെഡി ബിയറിനെ ആഗ്രഹിക്കാത്ത പെൺകുട്ടികളുണ്ടാകുമോ ? അങ്ങനെ ക്യൂട്ട് ടെഡിയെ നൽകുമ്പോൾ അവരുടെ മുഖത്ത് സന്തോഷം നിറയില്ലേ. പ്രണയവാരത്തിലെ ക്യൂട്ട് ദിവസമാണിത്. ഓമനത്വമുള്ള ടെഡിയുടെ മുഖം സമാധാനവും സന്തോഷവും പ്രണയിനികൾക്കിടയിൽ നിറയ്ക്കും. എത്ര അകലെയാണെങ്കിലും ആ ടെഡി നിങ്ങളുടെ പ്രണയം ഓർമപ്പെടുത്തി കൊണ്ടേയിരിക്കും.
ഫെബ്രുവരി 11 - പ്രോമിസ് ഡേ
ജീവിതകാലം മുഴുവൻ ഞാൻ നിന്റേതായിരിക്കും. ഇങ്ങനെയൊരു ഉറപ്പ് പ്രിയപ്പെട്ടയാൾ തരുന്നതിലും വലുതായി മറ്റെന്താണ് ഉള്ളത്. മറ്റെല്ലാ സമ്മാനങ്ങളേക്കാളും സന്തോഷം അങ്ങനെയാരു വാക്കിനുണ്ടാകും. വാലന്റൈൻസ് വീക്കിലെ അഞ്ചാം ദിവസമാണ് ആ സുദിനം. പ്രണയം നിറവേറ്റാൻ, എന്നും ഒന്നിച്ചുണ്ടാകാൻ സാധ്യമായതെല്ലാം നിങ്ങൾ ചെയ്യുമെന്ന് പ്രിയപ്പെട്ടവർക്ക് വാക്കു നൽകണം.
ഫെബ്രുവരി 12 - ഹഗ് ഡേ
പ്രണയാർദ്രമായി ഒന്ന് കെട്ടിപ്പിടിക്കുമ്പോൾ എത്രയോ കാര്യങ്ങൾ പറയാതെ പറായാനാവും. നിങ്ങളുടെ സ്നേഹവും കരുതലും ആ ആലിംഗനം വിളിച്ചു പറയും. എല്ലാം മറന്ന്, നിങ്ങളുടേത് മാത്രമായ ഒരു ലോകം സൃഷ്ടിക്കപ്പെടും. അതാണ് ഹഗ് ഡേ. പ്രണയിക്കുന്നവരെ മാത്രമല്ല, പ്രിയപ്പെട്ടവരെയും സുഹൃത്തുക്കളേയും അന്നു കെട്ടിപ്പിടിക്കാം. മനസ്സിനേറ്റ വലിയ മുറിവുകൾ ഇല്ലാതാക്കാം.
ഫെബ്രുവരി 13 - കിസ് ഡേ
സമ്മാനങ്ങളും വാക്കും നൽകി പ്രണയം അറിയിച്ചില്ലേ. ഇനി ഒരു സ്നേഹ ചുംബനം നൽകി ആ പ്രണയം ഒാർമയിൽ സൂക്ഷിക്കാം. ഒരിക്കലും മറക്കാനാകത്ത ഒന്നായി ഈ അനുഭവം ഒപ്പമുണ്ടാകട്ടേ.
ഫെബ്രുവരി - 14 വാലന്റൈൻസ് ഡേ
ഒടുവിൽ ആ ദിവസം വന്നെത്തും. ഫെബ്രുവരി 14. പ്രണയം ആഘോഷമാക്കുന്ന, പ്രണയത്തിനു വേണ്ടിയുള്ള ദിനം. റോമന് പുണ്യാളനായ വാലന്റൈന്റെ ഓര്മ ദിവസം. ഒന്നിച്ച് ആഘോഷിച്ചും സ്വപ്നങ്ങൾ പങ്കിട്ടും ആ ദിവസത്തെ വരവേൽക്കാം.
English Summary : Love N Life - Specialities of the days in valentine week