കൗതുകക്കാഴ്ചയായി സഞ്ചരിക്കുന്ന മരുപ്പച്ച; മാസ്കിനേക്കാൾ സൗകര്യപ്രദമെന്ന് അലൻ

കോവിഡ് പ്രതിരോധത്തിന് എല്ലാവരും സാമൂഹിക അകലം പാലിക്കാനാണ് ഗവൺമെന്റ് നിർദ്ദേശിച്ചത്. എന്നാൽ ബെൽജിയത്തിലെ ബ്രസൽസിൽ ഒരു കലാകാരൻ തന്റെ തല ഒന്നാകെ ഈ ലോകത്തിൽ നിന്നു തന്നെ ഐസൊലേറ്റ് ചെയ്തു കളഞ്ഞു. ഇതിനായി അലൻ വെർചൂരൻ എന്ന കലാകാരൻ തലയിലേറ്റിയത് ഒരു സഞ്ചരിക്കുന്ന മരുപ്പച്ചയാണ്.

ഒരു പ്ലെക്സി ഗ്ലാസ് മിനി ഗ്രീൻഹൗസ് തോളിലേറ്റി അതിനുള്ളിൽ തന്റെ തല കയറ്റി വച്ചാണ് അലൻ  നഗരത്തിലൂടെ ചുറ്റുന്നത്. ആ ഗ്ലാസ് ഹൗസിനുള്ളിൽ ഉള്ളതാകട്ടെ നല്ല ശുദ്ധവായു നൽകുന്ന സുഗന്ധവാഹിനികളായ ലാവെൻഡർ അടക്കമുള്ള സസ്യങ്ങളും.

താൻ മുൻപ്  ജോലി ചെയ്തിരുന്ന ടുണീഷ്യയിലെ മരുപ്പച്ചകളിൽ നിന്നും പ്രചോദനമുൾക്കൊണ്ട് 15 വർഷം മുൻപാണ് അലൻ ഈ ആശയം അവതരിപ്പിച്ചത്. ദുർഗന്ധം പരത്തുന്ന ശബ്ദായമാനമായതും മലിനമായതുമായ ലോകത്തുനിന്ന് തന്നെ സ്വയം പ്രതിരോധിക്കുന്നതിനു വേണ്ടിയാണ് ഈ സഞ്ചരിക്കുന്ന മരുപ്പച്ച അലൻ തയ്യാറാക്കിയത്. അത് പിന്നീട് കോവിഡ് കാലത്ത് മാസ്കിന് പകരം സ്വീകരിക്കാവുന്ന വ്യത്യസ്തമായ പ്രതിരോധ കവചമായി തീർന്നു.

ആസ്മയുള്ള തനിക്ക് മാസ്കിനേക്കാൾ സൗകര്യപ്രദം സ്വച്ഛന്ദമായി ശ്വസിക്കാവുന്ന ഈ മരുപ്പച്ചയാണെന്നും അലൻ പറയുന്നു. എന്തായാലും കുറഞ്ഞ നാളുകൾക്കുള്ളിൽ ബ്രസൽസ് നഗരത്തിലെ ഒരു കൗതുകക്കാഴ്ചയായി അലനും ഈ സഞ്ചരിക്കുന്ന മരുപ്പച്ചയും മാറി.

English Summary : Belgian artist Alain Verschuere's 'portable oasis' creates COVID-free bubble for one