ലോക്കൽ ട്രെയിനിൽ തുണി ഉണക്കൽ; വൈറൽ വിഡിയോ

മുംബൈയിലെ ലോക്കൽ ട്രെയിനിൽ യാത്രക്കാർ തുണി ഉണക്കാൻ ഇട്ടതിന്റെ വിഡിയോ വൈറലാകുന്നു. കോച്ചിനുള്ളിലെ ഫാനിനു താഴെയാണു തുണികൾ വിരിച്ചത്. മുംബൈയിലെ കനത്ത മഴ സൃഷ്ടിച്ച മറ്റൊരു പ്രശ്നം എന്ന നിലയിലാണ് വിഡിയോ പ്രചരിക്കുന്നത്. 

യാത്രക്കാർ നിറഞ്ഞ, ഓടിക്കൊണ്ടിരിക്കുന്ന ട്രെയിനിലെ ഈ വസ്ത്രമുണക്കൽ ദാദർമുംബൈക്കർ എന്ന ഇൻസ്റ്റഗ്രാം പേജിലാണു പങ്കുവച്ചത്. ‘ഇതു മുംബൈയിൽ മാത്രമേ സംഭവിക്കൂ’ എന്നാണ് വിഡിയോയ്ക്കൊപ്പം കുറിച്ചത്. എന്നാൽ ഇതൊരു പുതിയ സംഭവമല്ലെന്നാണു ചിലരുടെ വാദം. മഴക്കാലത്ത് ട്രെയിനുകളിൽ ഇതൊരു സാധാരണ കാഴ്ചയാണെന്ന് ഇവർ ചിത്രങ്ങൾ സഹിതം വ്യക്തമാക്കുന്നു. എന്തായാലും ഈ പ്രവൃത്തിയെ വിമർശിച്ചും നിരവധി കമന്റുകൾ കാണാം. മറ്റുള്ളവരെ ബുദ്ധിമുട്ടിക്കുന്നതും അനാരോഗ്യകരവുമാണെന്നാണു വിമർശകരുടെ വാദം.

കഴിഞ്ഞ ആഴ്ച മുംബൈയിൽ മഴ ശക്തിയാർജ്ജിച്ചിരുന്നു. പലയിടത്തും വെള്ളക്കെട്ട് രൂപപ്പെടുകയും ഗതാഗതത്തെ ബാധിക്കുകയും ചെയ്തു.