വിക്രം ലാൻഡറെ നാസയും കൈവിടുന്നു, വ്യക്തമായ ചിത്രം ഉറപ്പില്ലെന്ന് ഗവേഷകൻ
Mail This Article
അമേരിക്കൻ ബഹിരാകാശ ഏജൻസിയായ നാസയുടെ ചാന്ദ്ര റീകണൈസൻസ് ഓർബിറ്ററിന്റെ (എൽആർഒ) പ്രോജക്ട് സയന്റിസ്റ്റ് നോയി ഇ പെട്രോ പറഞ്ഞത് ചന്ദ്രനിൽ ഇരുട്ടാകാൻ തുടങ്ങി എന്നാണ്. ഞങ്ങളുടെ എൽആർഒ വിക്രം ലാൻഡറിന്റെ ചിത്രങ്ങൾ എടുക്കും. പക്ഷേ ഫോട്ടോകൾ വ്യക്തമാകുമെന്നതിന് യാതൊരു ഉറപ്പുമില്ല. കാരണം വൈകുന്നേരം സൂര്യപ്രകാശം കുറവാണ്. അത്തരമൊരു സാഹചര്യത്തിൽ ചന്ദ്രന്റെ ഉപരിതലത്തിൽ ഏതെങ്കിലും വസ്തുവിന്റെ വ്യക്തമായ ചിത്രങ്ങൾ എടുക്കുക എന്നത് ഒരു വെല്ലുവിളിയാണ്. എന്നാൽ ഏത് ചിത്രങ്ങൾ വന്നാലും ഞങ്ങൾ അവ ഇന്ത്യൻ ബഹിരാകാശ ഏജൻസിയായ ഇസ്രോയുമായി പങ്കിടുമെന്നും അറിയിച്ചിട്ടുണ്ട്.
നാസയും ഡീപ് സ്പേസ് നെറ്റ്വർക്കിന്റെ മൂന്ന് കേന്ദ്രങ്ങളുമായി ചന്ദ്രയാൻ -2 ന്റെ ഓർബിറ്ററും ലാൻഡറുമായി ബന്ധപ്പെടാൻ നിരന്തരം ശ്രമിക്കുന്നുണ്ട്. ഈ മൂന്ന് കേന്ദ്രങ്ങൾ - സ്പെയിനിലെ മാഡ്രിഡ്, യുഎസ്എയിലെ കാലിഫോർണിയയിലെ ഗോൾഡ്സ്റ്റോൺ, ഓസ്ട്രേലിയയിലെ കാൻബെറ എന്നിവിടങ്ങളിലാണ്. ഈ മൂന്ന് സ്ഥലങ്ങളിൽ സ്ഥാപിച്ചിട്ടുള്ള ശക്തമായ ആന്റിനയ്ക്ക് ചന്ദ്രയാൻ -2 ന്റെ ഓർബിറ്ററുമായി ബന്ധപ്പെടാൻ കഴിയും. എന്നാൽ വിക്രം ലാൻഡറിലേക്ക് അയച്ച സന്ദേശങ്ങളോട് ഒരു പ്രതികരണവും ലഭിക്കുന്നില്ല. എന്നിരുന്നാലും ചന്ദ്രയാൻ -2 ന്റെ ഓർബിറ്റർ അത് സ്വീകരിക്കുന്ന സന്ദേശങ്ങൾക്ക് മറുപടി നൽകുന്നു.
ഇന്ത്യയുടെ സ്വപ്ന പദ്ധതിയായ ചന്ദ്രയാൻ–2 ലെ വിക്രം ലാന്ഡറുമായി ബന്ധം സ്ഥാപിക്കാനാകാത്തതിൽ ഇസ്രോയ്ക്കു പുറമെ നാസ ഗവേഷകര്ക്കും ഏറെ വിഷമമുണ്ട്. ഇന്ത്യയുടെ ചന്ദ്രയാൻ–2 ദൗത്യത്തിൽ നാസയ്ക്കും ചെറിയ പങ്കുണ്ടായിരുന്നു. ചില ടെക്നോളജികളും ഡേറ്റകളും നൽകി ഇസ്രോയെ സഹായിച്ചത് നാസയാണ്. ഇതിനാലാണ് വിക്രം ലാൻഡറുമായി ബന്ധം സ്ഥാപിക്കാൻ നാസയും മുന്നിട്ടിറങ്ങിയിരിക്കുന്നത്.
വിക്രം ലാൻഡറിൽ നാസയുടെ ലേസർ റിഫ്ലക്റ്റർ അറേ ഇൻസ്റ്റാൾ ചെയ്തിട്ടുണ്ട്. ഇത് ലാൻഡറിന്റെ കൃത്യമായ സ്ഥാനവും ലാൻഡിംഗ് സ്ഥലവും കണ്ടെത്തുന്നതിന് വേണ്ടിയായിരുന്നു. ഭൂമിയിൽ നിന്ന് ചന്ദ്രനിലേക്കുള്ള കൃത്യമായ ദൂരം കണക്കാക്കാനും ലേസർ റിഫ്ലക്ടറിന് കഴിവുണ്ട്. ഭൂമിയില് ചന്ദ്രനിലേക്കുള്ള ദൂരത്തിന്റെ കൃത്യത അവരുടെ ഭാവി ദൗത്യങ്ങൾ ആസൂത്രണം ചെയ്യാൻ നാസയെ സഹായിക്കുമായിരുന്നു. എന്നാൽ വിക്രമിന്റെ ഹാർഡ് ലാൻഡിങ്ങിന് ശേഷം ലേസർ റിഫ്ലക്റ്റർ അറേയ്ക്ക് എന്തു സംഭവിച്ചുവെന്ന് അറിയില്ല.
ഇതോടൊപ്പം ചന്ദ്രയാൻ 2 ന്റെ എട്ട് പേലോഡുകളിൽ നിന്ന് ധാരാളം സുപ്രധാന ഡേറ്റകൾ നാസ പ്രതീക്ഷിക്കുന്നുണ്ട്. ഇത് 3D മാപ്പിങ്ങിനും ചന്ദ്രന്റെ ദക്ഷിണധ്രുവ പ്രദേശത്തിന്റെ വ്യക്തമായ ചിത്രങ്ങൾക്കും നാസയെ സഹായിക്കും. ആർടെമിസ് പ്രോഗ്രാമിന് കീഴിൽ 2024 ഓടെ നാസ മനുഷ്യനെ ചന്ദ്രന്റെ ദക്ഷിണധ്രുവത്തിലേക്ക് അയയ്ക്കാൻ പദ്ധതിയിട്ടിരിക്കുന്നതിനാലാണ് ചന്ദ്രന്റെ ദക്ഷിണധ്രുവത്തെക്കുറിച്ച് കൂടുതൽ അറിയാൻ ആഗ്രഹിക്കുന്നത്.