കൊറോണവൈറസിൽ നിന്ന് നിങ്ങളെ സംരക്ഷിക്കാൻ രക്തഗ്രൂപ്പ് സഹായിക്കും, അറിഞ്ഞിരിക്കാം ചില കാര്യങ്ങൾ

ഏതെങ്കിലും പ്രത്യേകം രക്ത ഗ്രൂപ്പുള്ളവര്‍ക്ക് കോവിഡ് വരാന്‍ സാധ്യത കുറയുമോ? കുറയുമെന്നാണ് ജനറ്റിക് ടെസ്റ്റിങ് കമ്പനിയായ 23ആൻഡ്മിയുടെ ഗവേഷകരുടെ കണ്ടെത്തല്‍. ഒ ഗ്രൂപ്പ് രക്തമുള്ളവര്‍ക്ക് മറ്റുള്ളവരെ അപേക്ഷിച്ച് കോവിഡ് വരാന്‍ 18 ശതമാനം കുറവു സാധ്യതയേ ഉള്ളൂവെന്നാണ് കണ്ടെത്തല്‍. കൂടാതെ കോവിഡ് വൈറസുമായി നിരന്തര സമ്പര്‍ക്കത്തിലുള്ള ഒ ഗ്രൂപ്പുകാര്‍ക്ക് രോഗം പിടിപെടാന്‍ മറ്റുള്ളവരെ അപേക്ഷിച്ച് 26 ശതമാനം സാധ്യത കുറവാണെന്നും പഠനം പറയുന്നു. 

ഏതാണ്ട് 7.50 ലക്ഷം പേരില്‍ നടത്തിയ വിപുലമായ പഠനമാണ് ഗവേഷകരെ ഈ നിഗമനത്തിലെത്തിച്ചത്. പഠനത്തിനായി വിവരശേഖരണം നടത്തിയവരില്‍ പതിനായിരത്തോളം പേര്‍ കോവിഡ് ബാധിതരായിരുന്നു. ആകെ നടത്തിയ പരിശോധനയില്‍ കോവിഡ് പോസിറ്റീവായവരില്‍ ഒ ഗ്രൂപ്പുകാര്‍ മറ്റുള്ളവരെ അപേക്ഷിച്ച് ഒമ്പത് മുതല്‍ 18 ശതമാനം വരെ കുറവായിരുന്നു. ആകെ പരിശോധിച്ചവരില്‍ 1.3 ശതമാനം ഒ പോസിറ്റീവ് രക്തഗ്രൂപ്പുകാരിലാണ് കോവിഡ് 19 രോഗമുള്ളതായി തെളിഞ്ഞത്. ഇത് എ ഗ്രൂപ്പുകാരില്‍ 1.4 ശതമാനവും ബി ഗ്രൂപ്പുകാരിലും എ.ബി ഗ്രൂപ്പുകാരിലും ഇത് 1.5 ശതമാനവുമായിരുന്നു. 

കോവിഡ് രോഗികളുമായി നേരിട്ട് സമ്പര്‍ക്കത്തിലുള്ള ആരോഗ്യപ്രവര്‍ത്തകരെ പോലുള്ളവര്‍ക്കിടയിലെ ഒ രക്തഗ്രൂപ്പുകാര്‍ക്ക് മറ്റു ഗ്രൂപ്പുകാരെ അപേക്ഷിച്ച് 13 മുതല്‍ 26 ശതമാനം വരെ കുറവാണ് കോവിഡ് പോസിറ്റീവാകാന്‍ സാധ്യത. നിരന്തരം കോവിഡ് രോഗികളുമായി സമ്പര്‍ക്കത്തിലുള്ളവരില്‍ 3.2 ശതമാനം ഒ ഗ്രൂപ്പുകാരിലാണ് കോവിഡ് സ്ഥിരീകരിച്ചത്. എ ഗ്രൂപ്പില്‍ ഇത് 3.9 ശതമാനവും ബി ഗ്രൂപ്പില്‍ നാല് ശതമാനവും എ,ബി ഗ്രൂപ്പില്‍ ഇത് 4.1 ശതമാനവുമായിരുന്നു. 

നേരത്തെയും ഒ ഗ്രൂപ്പുകാര്‍ക്ക് കോവിഡ് പിടിപെടാന്‍ മറ്റു രക്തഗ്രൂപ്പുകാരെ അപേക്ഷിച്ച് സാധ്യത കുറവാണെന്ന പഠനങ്ങള്‍ പുറത്തുവന്നിരുന്നു. ചൈനയില്‍ മാര്‍ച്ചില്‍ പുറത്തുവന്ന ഒരു ഗവേഷണത്തില്‍ എ ഗ്രൂപ്പുകാര്‍ക്ക് ഇതര ഗ്രൂപ്പുകാരെ അപേക്ഷിച്ച് കോവിഡ് വരാന്‍ സാധ്യതകൂടുതലാണെന്ന് വ്യക്തമാക്കിയിരുന്നു. ഇറ്റാലിയന്‍ സ്പാനിഷ് ഗവേഷകരുടെ സംയുക്ത പഠനവും സമാനമായ ഫലം പുറത്തുവിട്ടിരുന്നു. 

കൊളംബിയ സര്‍വ്വകലാശാലയിലെ ഇര്‍വിങ് മെഡിക്കല്‍ സെന്ററിന്റെ പഠനത്തില്‍ എ ഗ്രൂപ്പില്‍ പെട്ടവര്‍ക്ക് മറ്റുള്ളവരെ അപേക്ഷിച്ച് കോവിഡ് വരാന്‍ 33 ശതമാനം സാധ്യത കൂടുതലാണെന്നാണ് പറഞ്ഞിരുന്നു. മറ്റുഗ്രൂപ്പുകാരെ അപേക്ഷിച്ച്  ഒ ഗ്രൂപ്പുകാര്‍ക്ക് കോവിഡ് വരാനുള്ള സാധ്യത കുറവാണെന്നും കൊളംബിയ സര്‍വ്വകലാശാലയുടെ പഠനത്തിലുണ്ടായിരുന്നു.

English Summary: Could your blood type help protect you from coronavirus?