പുകയിലയിൽ നിന്നും കൊറോണവൈറസ് വാക്സിൻ, ദിവസങ്ങൾക്കുള്ളിൽ മനുഷ്യരിൽ പരീക്ഷിക്കും

ലോകം ഒന്നടങ്കം കൊറോണവൈറസ് വാക്സിൻ വികസിപ്പിച്ചെടുക്കാൻ പരിശ്രമിക്കുകയാണ്. ഇതിനിടെ പുകയിലയിൽ നിന്ന് തയാറാക്കിയ കോവിഡ് വാക്സിനും മനുഷ്യരിൽ പരീക്ഷിക്കാൻ പോകുകയാണ്. ബ്രിട്ടിഷ് അമേരിക്കൻ ടുബാക്കോ കമ്പനിയുടെ വാക്സിൻ ഈ ആഴ്ച തന്നെ മനുഷ്യരിൽ പരീക്ഷിക്കുമെന്നാണ് പ്രഖ്യാപിച്ചിരിക്കുന്നത്.

പുകയില സസ്യങ്ങളിൽ ഉൽ‌പാദിപ്പിക്കുന്ന പരീക്ഷണാത്മക കോവിഡ് -19 വാക്സിൻ ആഴ്ചകൾക്കുള്ളിൽ ക്ലിനിക്കൽ പരീക്ഷണങ്ങൾ ആരംഭിച്ചേക്കാം. പുകയിലയിൽ നിന്നുള്ള പ്രോട്ടീൻ വേർതിരിച്ചെടുത്താണ് വാക്സിൻ വികസിപ്പിച്ചെടുത്തത്. ലക്കി സ്ട്രൈക്ക് സിഗരറ്റ് നിർമാതാക്കളായ ബ്രിട്ടിഷ് അമേരിക്കൻ ടുബാക്കോ പി‌എൽ‌സി, യു‌എസ് ഫുഡ് ആൻഡ് ഡ്രഗ് അഡ്മിനിസ്ട്രേഷനിൽ നിന്ന് ഏത് ദിവസവും പരീക്ഷണത്തിനുള്ള അനുമതി ലഭിക്കാമെന്ന് ചീഫ് മാർക്കറ്റിങ് ഓഫിസർ കിംഗ്സ്ലി വീറ്റൺ പറഞ്ഞു.

ഞങ്ങൾക്ക് ശുഭാപ്തി വിശ്വാസമുണ്ട്, മികച്ച ഒരു നാളെയെ കെട്ടിപ്പടുക്കുന്നതിനുള്ള തന്ത്രത്തിന്റെ ഒരു പ്രധാന ഭാഗമാണിതെന്ന് വീറ്റൺ പറഞ്ഞു. ശ്വാസകോശ രോഗങ്ങൾക്ക് കാരണമാകുന്ന പുകയില നിർമാണ കമ്പനി തന്നെയാണ് കൊറോണ വൈറസിനെതിരെ വാക്സിൻ വികസിപ്പിക്കാൻ ശ്രമിക്കുന്നത്. വാക്സിൻ വിജയകരമാണെങ്കിൽ 2021 ന്റെ ആദ്യ പകുതിയിൽ ലഭ്യമാകുമെന്നും അധികൃതർ അറിയിച്ചു.

ലോകമെമ്പാടുമുള്ള ശ്വാസകോശ അർബുദത്തിന്റെ പ്രധാന കാരണമായ ഒന്നാണ് പുകയില. ബ്രിട്ടിഷ് അമേരിക്കൻ ടുബാക്കോ ലോകത്തിലെ രണ്ടാം നമ്പർ സിഗരറ്റ് നിർമാതാവാണ്. കൊറോണ വൈറസ് ബാധിച്ചവർ സിഗരറ്റ് വലിക്കുന്നത് രോഗം കഠിനമാകാനുള്ള സാധ്യതയുണ്ടെന്നും ലോകാരോഗ്യ സംഘടന മുന്നറിയിപ്പ് നൽകിയിട്ടുണ്ട്. പ്രീ-ക്ലിനിക്കൽ പരിശോധനയിൽ പരീക്ഷണാത്മക വാക്സിൻ ‘രോഗപ്രതിരോധ ശേഷി വർധിപ്പിക്കുമെന്ന് തെളിയിക്കപ്പെട്ടിട്ടുണ്ടെന്ന് ബ്രിട്ടിഷ് അമേരിക്കൻ ടുബാക്കോ നേരത്തെ അറിയിച്ചിരുന്നു.

കൊറോണ വൈറസിന്റെ കൃത്രിമമായി നിർമിച്ച ഒരു ഭാഗത്തെ അടിസ്ഥാനമാക്കിയാണ് ബ്രിട്ടിഷ് അമേരിക്കൻ ടുബാക്കോയുടെ പരീക്ഷണ വാക്സിൻ, ‘ആന്റിജൻ’ നിർമിച്ചിരിക്കുന്നത്. കൊറോണ വൈറസിന്റെ ഘടകമായ ഈ ആന്റിജൻ മനുഷ്യർക്ക് നൽകുമ്പോൾ ശരീരത്തിൽ നിന്ന് രോഗപ്രതിരോധ ശേഷി സൃഷ്ടിക്കുമെന്നാണ് ആശയം. ബ്രിട്ടിഷ് അമേരിക്കൻ ടുബാക്കോ ആന്റിജൻ വാക്സിൻ ഇപ്പോൾ മനുഷ്യരിൽ പരീക്ഷിക്കാൻ തയാറാണ്.

English Summary: Tobacco-Based Covid Vaccine May Start Clinical Trials in Weeks