780 കോടി ജനങ്ങളെ രക്ഷിക്കാൻ 9 വാക്സീനുകൾ, ബുക്ക് ചെയ്തിരിക്കുന്നത് 800 കോടി ഡോസ്

2020 വർഷം അവസാനിക്കാൻ ഇനി ദിവസങ്ങൾ മാത്രമാണ് ശേഷിക്കുന്നത്. ഈ വർഷം കൊറോണ വൈറസിന്റെ വർഷം കൂടിയായിരുന്നു. വൈറസിൽ നിന്ന് രക്ഷപ്പെടാൻ അതിവേഗം വാക്സീനുകൾ കണ്ടെത്തി എന്നതാണ് ഈ വർഷത്തെ ഏറ്റവും വലിയ നേട്ടങ്ങളിലൊന്ന്. ലോക ചരിത്രത്തിൽ ആദ്യമായാണ് ഇത്രയും കൂടുതൽ വാക്സീനുകൾ കുറഞ്ഞ സമയത്തിനുള്ളിൽ പരീക്ഷിച്ച് വിജയിച്ച് അവതരിപ്പിക്കുന്നത്. ഈ വര്‍ഷം അവസാനത്തിൽ തന്നെ ചില രാജ്യങ്ങളും വാക്സീനേഷൻ തുടങ്ങി.

ലോകമെമ്പാടുമുള്ള രാജ്യങ്ങൾ വാക്സീനുകൾ വികസിപ്പിക്കുന്നതിനും കൂടുതൽ ബുക്ക് ചെയ്യുന്നതിലുമായി ശ്രദ്ധകേന്ദ്രീകരിക്കുന്നതും നാം കണ്ടു. ചില വാക്സീനുകൾ ഇപ്പോഴും പരീക്ഷണ ഘട്ടത്തിലാണ്. ഇവയിൽ പലതും ഉപയോഗത്തിന് പോലും അംഗീകാരം ലഭിച്ചിട്ടില്ല. പുതിയ റിപ്പോർട്ടുകൾ പ്രകാരം ലോകത്തെ മുഴുവൻ ജനങ്ങൾക്കും വാക്സീനുകൾ നൽകാൻ മിക്ക കമ്പനികളും സജ്ജമായി എന്നാണ്. ഒൻപത് വാക്സീനുകളാണ് ഇപ്പോൾ സജീവമായി രംഗത്തുള്ളത്. ഇവയുടെ 800 കോടി ഡോസുകൾക്കാണ് ഇപ്പോൾ ഓർഡർ ലഭിച്ചിരിക്കുന്നത്.

വാക്സീനുകളുടെ പട്ടികയിൽ ഒന്നാമതുള്ളത് ഓക്സ്ഫോർഡ്-അസ്ട്രസെനെക്ക വാക്സീൻ തന്നെയാണ്. കൊറോണ വൈറസിനെതിരെ ഫലപ്രദമെന്ന് വാഗ്ദാനം ചെയ്ത ആദ്യത്തേതാണ് ഓക്സ്ഫോർഡ് – അസ്ട്രാസെനെക്ക ഗവേഷകർ വികസിപ്പിച്ചെടുത്ത ChAdOx1 അഡെനോവൈറസ് വാക്സീൻ. ഇതിന് 70 ശതമാനം ഫലപ്രാപ്തിയുണ്ട്. ഈ വാക്സീൻ ഓർഡർ ചെയ്തിരിക്കുന്നത് 3.29 ബില്യൺ ഡോസുകളാണ്.

ഇന്ത്യയിൽ ഈ വാക്സീൻ സീറം ഇൻസ്റ്റിറ്റ്യൂട്ട് ഓഫ് ഇന്ത്യയാണ് നിര്‍മിക്കുന്നത്. നിലവിൽ ഏറ്റവും കൂടുതൽ ഓർഡർ ലഭിച്ചതും ഈ വാക്സീന് തന്നെയാണ്. ഇതിന് പ്രധാന കാരണം ഏറ്റവും താങ്ങാനാവുന്ന വില തന്നെയാണ്. ഒരു ഡോസിന് ഏകദേശം 3-4 യുഎസ് ഡോളറാണ് വാങ്ങുന്നത്.

വാക്സീനുകളുടെ പട്ടികയിൽ രണ്ടാമതുള്ളത് നോവാവാക്സ് ആണ്. ഈ വാക്സീൻ മുൻകൂട്ടി ഓർഡർ ചെയ്തിരിക്കുന്നത് 1.38 ബില്യൺ ഡോസുകളാണ്. പട്ടികയിൽ മൂന്നാമതുള്ളത് ഫൈസർ-ബയോ‌ടെക് വാക്സിൻ ആണ്. അമേരിക്കൻ ഫാർമസ്യൂട്ടിക്കൽ ഭീമനായ ഫിസറും ജർമൻ ഫാർമസ്യൂട്ടിക്കൽ കമ്പനിയായ ബയോ ടെക്കും വികസിപ്പിച്ചെടുത്ത ബി‌എൻ‌ടി 162 വാക്സിൻ ആണിത്. യുകെ, യുഎസ്, കാനഡ, ലോകത്തിന്റെ മറ്റു പല ഭാഗങ്ങളിലും ഉപയോഗിക്കുന്നതിന് അംഗീകാരം ലഭിച്ച ആദ്യത്തെ വാക്സീൻ കൂടിയാണിത്. ലോകമെമ്പാടും 1.28 ബില്യൺ ഡോസ് ആണ് ഫൈസർ-ബയോ‌ടെക് കോവിഡ് വാക്സിൻ ഓർഡർ ചെയ്തിരിക്കുന്നത്. 

ജോൺസൺ, ജോൺസൺ വാക്സീൻ ആണ് മറ്റൊന്ന്. ഇതിന്റെ ഫലപ്രാപ്തി ഇതുവരെ വെളിപ്പെടുത്തിയിട്ടില്ലെങ്കിലും പ്രീഓർഡറുകളുടെ കാര്യത്തിൽ വളരെയധികം ശ്രദ്ധ ആകർഷിച്ച മറ്റൊരു വാക്സീനാണിത്. നിലവിലെ കണക്കനുസരിച്ച്, ജോൺസൺ, ജോൺസൺ വാക്സിൻ 1.27 ബില്ല്യൺ ഡോസുകൾ മുൻ‌കൂട്ടി ഓർഡർ ചെയ്തിട്ടുണ്ട്. മറ്റൊന്ന് സനോഫി / ജിഎസ്കെ വാക്സീൻ ആണ്. ഇതിന് 1.23 ബില്യൺ ഡോസുകളുടെ പ്രീഓർഡറുകൾ നേടാൻ കഴിഞ്ഞു. അതേസമയം വാക്സീൻ ഇപ്പോഴും പരീക്ഷണത്തിന്റെ പ്രാരംഭ ഘട്ടത്തിലാണ്.

മറ്റൊരു വാക്സീൻ മൊഡേണ ആണ്. SARS CoV-2 നെതിരെ 95 ശതമാനം വരെ ഫലപ്രദമാണെന്നാണ് മൊഡേണ അവകാശപ്പെടുന്നത്. എന്നാൽ, മൊഡേണയുടെ എം‌ആർ‌എൻ‌എ വാക്സിൻ‌ 780 ദശലക്ഷം ഡോസുകൾ‌ക്ക് മാത്രമാണ് പ്രീഓർ‌ഡറുകൾ‌ നേടാൻ‌ കഴിഞ്ഞത്. പരീക്ഷണങ്ങൾക്ക് വിധേയമായിട്ടും കുറച്ച് പ്രീഓർഡറുകൾ ലഭിച്ച മറ്റൊരു വാക്സീൻ ക്യൂറാവാക്കിന്റെ സിവിഎൻ‌കോവി ആണ്. ഇപ്പോൾ 410 ദശലക്ഷം ഡോസുകൾക്ക് പ്രീഓർഡറുകൾ ലഭിച്ചു. ഗമാലേയയുടെ സ്പുട്നിക്-വി ആണ് മറ്റൊരു വാക്സീൻ. കൊറോണ വൈറസിനെതിരെ 94 ശതമാനം ഫലപ്രാപ്തി കാണിച്ചതായി റിപ്പോർട്ട് ചെയ്തതിനെത്തുടർന്ന് റഷ്യൻ വാക്സിൻ ലോകത്തിലെ ആദ്യത്തെ വാക്സിൻ ഉപയോഗത്തിനായി അംഗീകരിച്ച ഒന്നാണ്. ഈ വാക്സീനിനായി ഇതുവരെ 340 ദശലക്ഷം ഡോസുകൾ മാത്രമാണ് മുൻകൂട്ടി ഓർഡർ ചെയ്തിട്ടുള്ളത്.

മറ്റൊരു വാക്സീൻ സിനോവാക് ആണ്. ചൈനീസ് ഫാർമസ്യൂട്ടിക്കൽ ഭീമനായ സിനോവാക് വികസിപ്പിച്ചെടുത്ത കോവിഡ്-19 വാക്സീൻ ഇപ്പോൾ 260 ദശലക്ഷം ഡോസുകൾക്കായി മുൻകൂട്ടി ഓർഡർ ചെയ്തിട്ടുണ്ട്. വാക്സീൻ ഇപ്പോഴും വികസിച്ചുകൊണ്ടിരിക്കുകയാണ്.

English Summary: Nine COVID-19 Vaccines, With Over 8 Billion Doses Preordered