സമൂഹമാധ്യമങ്ങളെ കുറിച്ചുള്ള പ്രവചനങ്ങൾ പിഴച്ചോ? കണക്കുകളും കാര്യങ്ങളും അതാണ് സൂചിപ്പിക്കുന്നത്. മനുഷ്യരാശിയുടെ തലവര ഇനി നിശ്ചയിക്കുക സമൂഹമാധ്യമങ്ങളായിരിക്കും എന്നായിരുന്നു ഇതുവരെ ലോകത്തിന്റെ വിശ്വാസം. എന്നാൽ അതിനിപ്പോൾ ഇളക്കം തട്ടിയിരിക്കുന്നു. ലോകത്തിന് അങ്ങനെ വിശ്വസിക്കാൻ മതിയായ കാരണങ്ങൾ ഉണ്ടായിരിക്കുന്നു. എന്താണവ? കണക്കുകൾ അനുസരിച്ച് 474 കോടി ആൾക്കാരാണ് ഏറ്റവും വലിയ 7 സാമൂഹമാധ്യമങ്ങൾ സന്ദർശിക്കുന്നത്. ഇത് ലോക ജനസംഖ്യയുടെ 59.3 ശതമാനം വരും. അതായത് ലോകത്തിലെ രണ്ടുപേരിൽ ഒരാൾ സാമൂഹമാധ്യമങ്ങളിലെ നിത്യ സന്ദർശകരാണ് എന്നർഥം. ഇവരുടെ എണ്ണം 9.2 ശതമാനം നിരക്കിൽ വർധിച്ചുകൊണ്ടിരിക്കുന്നു. കഴിഞ്ഞ വർഷം മാത്രം വർധിച്ചത് 19 കോടി പുതിയ സന്ദർശകർ എന്ന നിലയ്ക്കാണ്. സന്ദർശകരിൽ മഹാഭൂരിപക്ഷവും ഒരു മാസം ഏഴിലധികം സമൂഹമാധ്യമങ്ങൾ സന്ദർശിക്കുന്നു എന്നാണ് കണക്കുകൾ പറയുന്നത്. ഏറ്റവും അധികം ആൾക്കാർ സന്ദർശിക്കുന്ന സമൂഹമാധ്യമമായ ഫെയ്സ്ബുക്കിലെ ഒരു മാസത്തെ സന്ദർശകരുടെ എണ്ണം 300 കോടിക്കടുത്താണ്. യുട്യൂബിൽ ഇത് 230 കോടിയും വാട്സാപ്പിൽ 200 കോടിയുമാണ്.