APPLE EVENT 2023

വിസ്മയിപ്പിക്കും ക്യാമറയും വിലയിൽ മാറ്റങ്ങളുമായി ഐഫോൺ 15 സീരീസുകളെത്തി; ആപ്പിൾ ഇവന്റ് 2023 Apple Event 2023

പ്രതീക്ഷിച്ചിരുന്ന വില വർദ്ധനവും പ്രവചിച്ച പല സവിശേഷതകളുമായി ആഡംബര ഐഫോൺ 15 പ്രോ മാക്‌സ് ഉൾപ്പെടെ  ഐഫോൺ 15, ഐഫോൺ 15 പ്ലസ്, ഐഫോൺ 15 പ്രോ തുടങ്ങിയ 4 ഫോണുകളും ആപ്പിൾ വാച്ച് സീരീസ് 9 , ആപ്പിൾ വാച്ച് അൾട്ര 2  എന്നീ വാച്ചുകളും ആപ്പിൾ ഔദ്യോഗികമായി പുറത്തിറക്കി. ആപ്പിൾ പാർകിലെ സ്റ്റീവ് ജോബ്സ് തീയേറ്ററിൽ ഓൺലൈനായാണ് വണ്ടർലസ്റ്റ് എന്നു പേരിട്ട അവതരണം അരങ്ങേറിയത്.

ഈ വർഷം ഐഫോണുകളിലെ ഏറ്റവും പ്രധാനപ്പെട്ട മാറ്റം ചാർജ് ചെയ്യുന്നതിനായി യുഎസ്ബി-സി പോർട്ട് ചേർത്തതാണ്, പക്ഷേ ഇത്  വിപണിയിലെ ആൻഡ്രോയിഡ് ഫോണുകളിലും കാണുന്ന ഒരു സ്റ്റാൻഡേർഡ് ഫീച്ചർ ആണ്.കൂടാതെ സീരീസ് 9 ആപ്പിൾ കമ്പനിയുടെ ആദ്യത്തെ കാർബൺ ന്യൂട്രൽ ഉൽപ്പന്നമാണ്, ഈ വർഷം മുതൽ എല്ലാ വാച്ച് നിർമാണവും 100% ക്ലീൻ എനർജിയിൽ പ്രവർത്തിക്കുമെന്ന് കമ്പനി അറിയിച്ചു. വാച്ച് ബാൻഡുകൾ ഉൾപ്പെടെയുള്ള എല്ലാ ഉൽപ്പന്നങ്ങളിൽ നിന്നും ആപ്പിൾ തുകൽ ഉപേക്ഷിക്കും.

ഐഫോൺ 15 ന് ഡൈനാമിക് ഐലൻഡ് നോച്ച്, ചാർജ് ചെയ്യാനുള്ള യുഎസ്ബി-സി പോർട്ട്, 48 എംപി ക്യാമറ എന്നിവ ലഭിക്കുന്നു. ഐഫോൺ 15 പ്രോയ്ക്കും 15 പ്രോ മാക്‌സിനും പുതിയ ടൈറ്റാനിയം ബോഡി ഉണ്ടായിരിക്കും. ഐഫോൺ 15 പ്രോയും ഐഫോൺ 15 പ്രോ മാക്സും 48 എംപി പ്രൈമറി ക്യാമറ നിലനിർത്തുന്നു.പുതിയ സ്മാർട്ട് വാച്ച് അൾട്രാ 2, സീരീസ് 9 എന്നിവ മികച്ച ബാറ്ററി ബാക്കപ്പും ഡബിൾ ടാപ്പ് ഉൾപ്പെടെയുള്ള ഫീച്ചറുകളും വാഗ്ദാനം ചെയ്യുന്നു. .

ഐഫോൺ 15 & 15 പ്ലസ് വിശദാംശങ്ങൾ

ഐഫോൺ 15 ഡിസ്‌പ്ലേയ്ക്ക് 2,000 നിറ്റ്‌സ് പീക്ക് ബ്രൈറ്റ്‌നെസ് ഉണ്ട്. ഐഫോൺ 15ന് 6.1 ഇഞ്ച് ഡിസ്‌പ്ലേയാണെങ്കിൽ ഐഫോൺ 15 പ്ലസിന് 6.7 ഇഞ്ച് പാനലാണുള്ളത്.  കഴിഞ്ഞ വർഷം ഐഫോൺ 14 പ്രോ ഹാൻഡ്‌സെറ്റുകളിൽ അവതരിപ്പിച്ച എ16 ബയോണിക് ചിപ്പാണ് പുതിയ ഐഫോൺ 15-ൽ. രണ്ടാം തലമുറ അൾട്രാ വൈഡ് ബാൻഡ് ചിപ്പും (UWB) ഇതിലുണ്ട്. 

∙വില: 799 ഡോളർ (iPhone 15) & 899 ഡോളർ (iPhone 15 Plus)

∙പിങ്ക്, മഞ്ഞ, പച്ച, നീല, കറുപ്പ് നിറങ്ങളിൽ ലഭ്യമാണ്

∙കട്ടിയുള്ള സെറാമിക് ഗ്ലാസ് ഷീൽഡ്

∙48എംപി പ്രധാന ക്യാമറ

∙2x ടെലിഫോട്ടോ

∙കോണ്ടൂർഡ് എഡ്ജ്

ഐഫോൺ 15 പ്രോ, ഐഫോൺ 15 പ്രോ മാക്സ്

ആപ്പിൾ പുതിയ ഹൈ-എൻഡ് ഐഫോണുകൾ പ്രഖ്യാപിച്ചു.ഐഫോൺ 15 പ്രോ, ഐഫോൺ 15 പ്രോ എന്നിവ ടൈറ്റാനിയം ബോഡിയോടെയാണ് പ്രഖ്യാപിച്ചത്. ടൈപ് സി കണക്ടർ ഈ മോഡലുകളിലുമെത്തും. മികച്ച പെർഫോമൻസ് നൽകുന്ന ആദ്യ 3 നാനോ ചിപ്പ് ഈ മോഡലുകളിലുണ്ടാവുമെന്നതാണ് ഏറ്റവും വലിയ പ്രത്യേകത.  ആക്ഷൻ ബട്ടണുകളും ഉണ്ടായിരിക്കും. രണ്ടും ഈ വെള്ളിയാഴ്ച പ്രീഓർഡറിനും സെപ്റ്റംബർ 22ന് വിൽപ്പനയ്‌ക്കും ലഭ്യമാകും.

ഐഫോൺ 15നു സമാനമായി പ്രോയ്ക്ക് 6.1 ഇഞ്ച് സ്‌ക്രീൻ ഉണ്ട്, പ്രോ മാക്‌സിന് 6.7 ഇഞ്ച് ഡിസ്‌പ്ലേയുണ്ട്.  A17 പ്രോ ചിപ്പ് ഉയർന്ന ഗെയിമിങ് അനുഭവം നൽകുമെന്ന് ആപ്പിൾ പറയുന്നു. സൂപ്പർ റെറ്റിന എക്സിഡിആർ സംവിധാനമാണ് പ്രോയിലുള്ളത്. 4കെ വിഡിയോകള്‍ ഷൂട്ട് ചെയ്യാനാകും. 15 പ്രോയ്ക്ക് “സ്‌പേഷ്യൽ വീഡിയോ” ക്യാപ്‌ചർ ചെയ്യാൻ കഴിയും. വിഷന്‍ പ്രോയ്ക്കായും വിഡിയോ ഷൂട്ട് ചെയ്യാനാകും.

വാച്ച് സീരീസ് 9, വാച്ച് അൾട്രാ 2

ഏറ്റവും പുതിയ വാച്ച് സീരീസ് 9, വാച്ച് അൾട്രാ 2 എന്നിവ ആപ്പിൾ പ്രഖ്യാപിച്ചു.  ആപ്പിളിന്റെ ഏറ്റവും ശക്തമായ S9ചിപ്പ് ഉണ്ടായിരിക്കും. കോളുകൾ എടുക്കാനും സംഗീതം കേൾക്കാനോ, നിർത്താനോ രണ്ടുതവണ തട്ടിയാൽ മതിയാകുന്ന ഡബിൾ ടാപ് ഫീച്ചറും ലഭ്യമായിരിക്കും.   സീരീസ് 9-ൽ ഒറ്റ ചാർജിൽ 18 മണിക്കൂർ ബാറ്ററി ലൈഫും വാച്ച് അൾട്രാ 2-ൽ 36 മണിക്കൂർ വരെ ബാറ്ററി ലൈഫും നൽകുമെന്ന് കമ്പനി പറയുന്നു. ഇന്ത്യയിൽ ആപ്പിൾ വാച്ച് സീരീസ് 9 ന് 41,900 രൂപ വിലയിൽ (യുഎസിൽ $399) ആരംഭിക്കുന്നു, അത് സെപ്റ്റംബർ 22 മുതൽ ലഭ്യമാകും. 

ആപ്പിൾ ഐഫോൺ കെയ്‌സുകളിൽ നിന്നും വാച്ച് സ്‌ട്രാപ്പുകളിൽ നിന്നും ലെതർ ഒഴിവാക്കുകയും എല്ലാ പാക്കേജിംഗിൽ നിന്നും പ്ലാസ്റ്റിക് ഒഴിവാക്കുകയും മാക്ബുക്ക് കെയ്‌സുകളിൽ 100 ​​ശതമാനം അലുമിനിയം ഉപയോഗിക്കുകയും ചെയ്യുന്നു. 2030-ഓടെ പൂർണമായും കാർബൺ ന്യൂട്രൽ ആകാനാണ് കമ്പനി പദ്ധതിയിടുന്നത്. ആപ്പിളിന്റെ ആദ്യത്തെ കാർബൺ ന്യൂട്രൽ ഉൽപ്പന്നമാണ് വാച്ച് ബാൻഡ്.