കോതമംഗലം ∙ സംസ്ഥാന സർക്കാരിന്റെ 63 കൃഷിത്തോട്ടങ്ങളും നവീകരണത്തിന്റെ പാതയിൽ. ഇതിൽ നേര്യമംഗലം ഫാമിനെ ടൂറിസം കേന്ദ്രമാക്കാനും ലക്ഷ്യമിടുന്നു. ഇതിനായി 50 കോടി രൂപ മുടക്കും. 20 കോടി ഇതിനകം അനുവദിച്ചുകഴിഞ്ഞു.
പ്രതിവർഷം 3 ലക്ഷം സഞ്ചാരികളെ ഇവിടേക്ക് ആകർഷിക്കുകയാണു ലക്ഷ്യം. നേര്യമംഗലം ഫാം മേളയും നാടൻ ഭക്ഷ്യമേളയും ഉദ്ഘാടനം ചെയ്യവെ മന്ത്രി വി.എസ്. സുനിൽ കുമാറാണു നവീകരണ പദ്ധതികളെക്കുറിച്ചു പറഞ്ഞത്. ഫാമിൽ 4 പതിറ്റാണ്ടായി തരിശായിക്കിടന്ന ഭൂമിയിൽനിന്നുള്ള രക്തശാലി നെല്ലിന്റെ വിളവെടുപ്പും മന്ത്രി ഉദ്ഘാടനം ചെയ്തു.
